محمود مەشهەدانی: میلیشیاکان دەستبەرداری یاسای حەشدی شەعبی بوون

ئیرادە میدیا

مەحمود مەشهەدانی، سەرۆكی پەرلەمانی عێراق، لە چاوپێكەوتنێكی تایبەتدا چەندین نهێنی لەبارەی هەوڵە ناوخۆیی و دەرەکییەکان بۆ تێنەپەڕاندنی یاسای حەشدی شەعبی ئاشکرا کرد، بە تایبەتی ئاماژەی بە فشارەکانی ویلایەتە یەکگرتووەکانی ئەمەریکا و هەڕەشەی ئیسرائیل کرد.

مەشهەدانی ڕایگەیاند: لە کاتی هەوڵەکان بۆ تێپەڕاندنی یاسای حەشدی شەعبی، فشارەکانی ئەمریكا گەیشتە ئەو ئاستەی کە هەڕەشە بە کامپی هۆل و هەڵگرتنی پارێزبەندی سیاسی و ئەمنی بکات.

سەرۆکی پەرلەمان، وتویەتی: ئەمەریکییەکان داوایان لە سەرکردە سیاسی و ئاینییە شیعەکان کردووە ئەو یاسایە پەسەند نەکەن و جەختی لەوە کردەوە کە هێزە شیعەکان قەناعەتیان پێکرا واز لە دەرکردنی ئەو یاسایە بهێنن، سەرەڕای ئەوەی کە دەکرا یاساکە دەربکرێت.

لە بەشێکی دیکەی قسەکانیدا، مەشهەدانی ئاشکرای کرد: ئیسرائیل هەوڵیدا عێراق بۆردوومان بکات، بەڵام ئەمریکییەکان ڕێگەیان نەدا. ئەمە بەشێک بووە لە گوشارە نێودەوڵەتییەکان بۆ ڕێگریکردن لە پەسەندکردنی یاسای حەشدی شەعبی لە پەرلەمان.

مەحمود مەشهەدانی داوای گۆڕانکاری بنەڕەتی لە سیستەمی حوکمڕانی عێراقدا کرد و وتی: عێراق سەقامگیری نابێت تا لە وڵاتی پێکهاتەکانەوە نەگۆڕێت بۆ وڵاتی هاوڵاتیبوون.