دۆستێکی کورد دەبێتە یاریدەدەری وەزیری دەرەوەی ئەمریکا بۆ کاروباری ڕۆژهەڵاتی ناوەڕاست

ئیرادە میدیا

لیژنەی پەیوەندییەکانی دەرەوەی ئەنجومەنی پیرانی ئەمریکا بە فەرمی جۆیل ڕەیبێرنی، وەک یاریدەدەری وەزیری دەرەوە بۆ کاروباری ڕۆژهەڵاتی ناوەڕاست پەسند کرد. ئەم هەنگاوە نوێیە لەکاتێکدایە کە واشنتن هەوڵدەدات پێداچوونەوە بە دیدگا و سیاسەتەکانی بەرامبەر ناوچەکەدا بکات.

ڕەیبێرن، کە لەدایکبووی ساڵی ١٩٦٩یە، وەک کەسایەتییەکی شارەزا و خاوەن ئەزموونێکی زۆر لە کاروباری ناوچەکەدا سەیر دەکرێت. ئەو پێشتر چەندین پۆستی گرنگی لە وەزارەتی دەرەوە و ئەنجومەنی ئاسایشی نەتەوەیی ئەمریکا بەڕێوەبردووە. لە دیارترین پۆستەکانیدا، لە ماوەی یەکەم خولی سەرۆکایەتی ترەمپدا وەک نێردەی تایبەت بۆ سوریا کاری کردووە تا ساڵی ٢٠٢٠، لە ساڵانی ٢٠١٧ بۆ ٢٠١٨ بەڕێوەبەری یەکەمی ئەنجومەنی ئاسایشی نەتەوەیی بووە بۆ کاروباری ئێران، عێراق و سوریا.

پەسندکردنی ڕەیبێرن بۆ ئەم پۆستە هەستیارە وەک ئاماژەیەک بۆ ئەگەری گۆڕانکاری و جوڵەیەکی نوێ لە سیاسەتی ئەمریکا بەرامبەر ناوچەکە لێکدەدرێتەوە. چاوەڕوان دەکرێت ڕەیبێرن کار لەسەر چەندین دۆسیەی هەڵپەسێردراو بکات، بەتایبەتی پرسەکانی پەیوەندی بە ئێران، عێراق، لوبنان و سوریاوە.

سەبارەت بە دۆسیەی کورد، ڕەیبێرن داکۆکی لە بەهێزکردنی ئابووری ناوچەکانی ژێردەستی هەسەدە و ڕۆژئاوای کوردستان کردوە. لەبارەی هەرێمی کوردستانەوە، لە چاوپێکەوتنێکی ساڵی ٢٠٢٣دا جەختی لەوە کردەوە کە پێویستە هەرێم بە گوێرەی دەستوور بپارێزرێت و پشتیوانی لە هاوبەشی نێوان ستراتیژی ئەمریکا و هەرێمی کوردستان دەکات.

ڕەیبێرن جگە لە ئەزموونی سیاسی، ئەفسەری سوپای ئەمریکاش بووە و خاوەنی چەند کتێبێکە، لەوانە کتێبی "عێراق دوای ئەمریکا" و "سوپای ئەمریکا لە جەنگی عێراقدا".