هه‌ڕه‌شه‌ قورسه‌كه‌ى ئه‌مریكا گه‌یشته‌ عێراق‌و وه‌زیرى به‌رگرى عێراق هه‌موان ئاگادارده‌كاته‌وه‌

وەزیری جەنگی ئەمریکا هۆشداریی تووند لەبارەی "دەستدرێژی" بۆ سەر هێزەکانیان بەعێراق دەدات‌و بەهاوتا عێراقییەکەی ڕاگەیاندووە، "ئەمە دوا ئاگادارکردنەوەیە لەم بارەیەوە".

سابت عەباسی وەزیری بەرگریی عێراق لەچاوپێکەوتنێکی تەلەفزیۆنیدا، وردەکاریی پەیوەندییەکی تەلەفۆنی نێوان خۆیی‌و وەزیری جەنگی ئەمریکا، پێت هێگسسی ئاشکراکرد، کە تێیدا هێگسس بەڕوونی هۆشداریی زۆر توندو كۆتایی داوەتە عێراق سەبارەت بەهەر دەستدرێژییەک بۆسەر هێزەکانی ئەمریکا لەڕۆژئاوای عێراق.

وەزیری بەرگریی عێراق ڕایگەیاند، "وەزیری جەنگی ئەمریکا پێی ووتوە، ئەمە كۆتا ئاگادارکردنەوەیە لەمبارەیەوە، چونکە هێزەکانی ئەمریکا بەئازادی لەناوچەکەدا دەسوڕێنەوەو ئەمریکا بەهیچ شێوەیەک دەستدرێژی یان هێرش لەلایەن گرووپە چەکدارەکانی عێراقەوە قبووڵناکات".

عەباسی ئاماژەی بەوەکرد، "ئیدارەی ئێستای ئەمریکا بەتوندوتیژیی‌و یەکلاییکەرەوە لەبڕیارەکانیدا ناسراوە، بۆیه‌ پێویستە ئەم هۆشدارییە بەجددی وەربگیرێت".