به‌شێكى شه‌قامى 100 مه‌ترى سلێمانى به‌ڕووى هاتوچۆدا ده‌كرێته‌وه‌

شارەوانیی سلێمانی ئاشكرایكرد، کارکردن لەشەقامی 100 مەتریی سلێمانی بەردەوامەو لەچەند ڕۆژی داهاتوو بەشێکی دەکرێتەوە، ساڵی داهاتووش تەواوی شەقامەکە بەڕووی شوفێران دەکرێتەوە.

شەقامی 100 مەتریی سلێمانی کە بە"شاڕێی بابان"یش ناسراوە، یەکێکە لەپڕۆژە ستراتیژییەکان‌و درێژییەکەی 37 کیلۆمەترە، پڕۆژەکە حه‌وت یەکتربڕ، پێنج ئەندەرپاس، چوار پردو فلای ئۆڤەرێک‌و 68 ئاوبەرە لەخۆدەگرێت، بڕیاربوو پێش هەڵبژاردن بکرێتەوە، بەڵام بەهۆی هەندێ گرفتی تەکنیکی دواکەوت.

زەردەشت ڕەفیق وتەبێژی شارەوانیی سلێمانی ئاشكرایكردووه‌، "لەچەند ڕۆژی داهاتوودا، 26 کیلۆمەتر لەشەقامی 100 مەتریی شاری سلێمانی بەڕووی هاتووچۆی هاونیشتمانیان دەکرێتەوە، کە دەبێتە هۆی ئاسانکاریی زیاتر بۆ شۆفێران".

ئه‌وه‌شى وت، "ئەو 26 کیلۆمەترەی تەواوبووەو لەچەند ڕۆژی داهاتوو دەکرێتەوە، تاسڵوجە بەشەقامی تانجەرۆ دەبەستێتەوە، شەقامەکە لەڕێگەی بەرزە پردێکەوە بەگەڕەکی بەکرەجۆش دەبەسترێتەوە".

پڕۆژەی شەقامی 100 مەتریی شاری سلێمانی پڕۆژەیەکی ستراتیژییە، له‌11ى 7ى ساڵى 2020 بەردی بناغەی داندراو دەست بەکارکردن لەشەقامەکە کرا، به‌ڵام به‌چه‌ندین هۆكار شه‌قامه‌كه‌ تائێستا نه‌توانراوه‌ ته‌واوبكرێت‌و بڕى ئه‌و پاره‌یه‌شى بۆ پڕۆژه‌كه‌ ته‌رخانكراوه‌ 44 ملیار دیناره‌.