سەرژمێری عێراق: ژمارەی دانیشتووان 45 ملیۆن کەسی تێپەڕاند

ئیرادە میدیا

بڕیارە سبەینێ چوارشەممە، 26ی تشرینی دووەمی 2025، وەزارەتی پلاندانانی عێراق، وردەکاریی ئەنجامەکانی سەرژمێریی گشتیی دانیشتوانی عێراق و هەرێمی کوردستان بەگوێرەی پارێزگاکان بڵاو بکاتەوە. ئەمە دوای ئەوە دێت کە پێنج ڕۆژ لەمەوبەر ئەنجامی بەرایی سەرژمێرییەکە بڵاو کرایەوە.

عەبدولزەهرە هنداوی، وتەبێژی وەزارەتی پلاندانانی عێراق، ئەمڕۆ سێشەممە رایگەیاند: ئەنجامە وردەکارییەکان، کاژێر 9:00ـی بەیانیی سبەینێ لەلایەن محەممەد تەمیم، وەزیری پلاندانانەوە ڕادەگەیەندرێت.

سەرژمێریی گشتیی دانیشتوان لە سەرانسەری عێراق و هەرێمی کوردستان لە 20ی تشرینی دووەمی 2024 ئەنجامدرا. بەگوێرەی ئاماری بەرایی، ژمارەی دانیشتووانی وڵات 45 ملیۆن کەسی تێپەڕاندووە.

وتەبێژی وەزارەتی پلاندانانی عێراق ڕایگەیاند: وەزارەتی پلاندانان وردەکاریی ئەنجامی سەرژمێریی 15 پارێزگاکەی عێراق ڕادەگەیێنێت و هەرێمی کوردستانیش لەلای خۆیانەوە هەمان ئەنجامی پارێزگاکانی خۆیان (هەولێر، سلێمانی، دهۆک و هەڵەبجە) بڵاو دەکەنەوە.