حكومه‌تى هه‌رێم له‌باره‌ى كه‌ناڵه‌كانى بین سپۆرته‌وه‌ بڕیارێكى به‌په‌له‌ى ده‌ركرد

وەزارەتی گواستنەوەو گەیاندنی حکوومەتی هەرێم بڕیاریدا بەڕاگرتنی پەخشی کەناڵەکانی 'beIN SPORTS' کە بەشێوەی نایاسایی‌و لەڕێگەی سیستەمی (IPTV)ەوە پەخشدەکرێن‌و مۆڵەتی یەک مانگی بۆ جێبەجێکردنی بڕیارەکە دیاریکرد.

وەزارەتی گواستنەوەو گەیاندنی حکوومەتی هەرێم لەڕاگەیاندراوێکدا ئاشکرایکرد، بەمەبەستی ڕاگرتنی پەخشی هەندێک کەناڵی بێ مۆڵەت‌و پاراستنی مافی خاوەندارێتی، بڕیارێکی نوێی دەرکردووە.

بەگوێرەی ڕاگەیاندراوەکە، بەڕێوەبەرایەتیی گشتیی پۆستەو گەیاندن لەڕۆژى 17ى ئه‌م مانگه‌وه‌ بەنووسراوی فەرمی کۆمپانیاکانی بواری ئینتەرنێتی ئاگادارکردووەتەوە، کە دەبێت پەخشی کەناڵەکانی (beIN   SPORTS)  ڕابگرن کە لەڕێگەی پەخشی ئۆنلاین‌و هەندێک کەناڵی ناوخۆییەوە بەنایاسایی‌و بەشێوازی (IPTV) پەخشدەکرێن.

وەزارەتی گواستنەوە ئاماژەی بەوەکردووە، ئەم بڕیارە بۆ ڕێگرتنە لەو سەرپێچییە نایاساییانەو پاراستنی مافی پەخش‌و بڵاوکردنەوەیە، بۆ ئەو مەبەستەش مۆڵەتی یەک مانگی بۆ کۆمپانیاکانی خزمەتگوزاریی ئینتەرنێت دیاریکردووە بۆ ڕاگرتنی ئەو پەخشانە.

لەکۆتایی ڕاگەیاندراوەکەدا جەختکراوەتەوە، هەر کەناڵێک بیەوێت لەڕێگەی ئینتەرنێتەوە پەخشی دامەزراوەی (beIN SPORTS) بکات، پێویستە لەڕێگەی بریکاری فەرمیی ئەو دەزگایەوە بێت، ئەمەش لەبەر پاراستنی مافی خاوەندارێتیی فیکری‌و یاسایی بەپێی یاساو ڕێنماییە بەرکارەکانی حکوومەتی هەرێمی کوردستان.