دەیان هەزار سەربازی ئیسرائیلی بەهۆی كێشەی دەروونییەوە چارەسەر وەردەگرن

ناوەندی هەواڵ

ڕۆژنامەی جۆرۆزالیم پۆستی ئیسرائیلی ئاشكرای كردووە كە زیاتر لە 82 هەزار سەرباز چارەسەری پزیشكی وەردەگرن، لەو ڕێژەیەشدا 58%یان پەیوەندی بە كێشەی دەروونییەوە هەیە، بەتایبەت شۆكبوونی كاتی جەنگ.

بەپێی ئامارێكی فەرمی وەزارەتی بەرگریی ئیسرائیل، 22 هەزار ئەفسەر و سەرباز لە ماوەی جەنگی غەززەدا بریندار بوون.

هەرچەندە گرووپە فەڵەستینییەكان و بەشێك لە میدیا جیهانییەكان ئاماژە بەوە دەدەن كە ژمارەی كوژراو و بریندارانی سوپای ئیسرائیل زۆر زیاترە لەو ئامارەی كە وەزارەتەكە ڕایگەیاندووە.

بەپێی ڕاگەیەندراوی وەزارەتی بەرگریی ئیسرائیل، مانگانە نزیكەی هەزارو 500 داواكاریی نوێ بۆ چارەسەری دەروونییان پێشكەش دەكرێت و پێشبینی دەكرێت تا ساڵی 2028 ئەم ڕێژەیە بگاتە 100 هەزار كەس.

ڕاپۆرتە نێودەوڵەتییەكان پێشتر ئاماژەیان بە ئەنجامدانی كاری دڕندانە و نامرۆڤانە لەلایەن سەربازانی ئیسرائیلەوە لە غەززە كردووە.

بەپێی هەواڵی بەشێک لەمیدیا جیهانییەکان، حكومەتی ئیسرائیل شكستی هێناوە لە پاراستنی تەندروستی دەروونی سەربازەكانی، ئەوەش كاریگەری قوڵی لەسەر ژیانی سەربازان و خێزانەكانیان دروست كردووە و كێشەیەكی گەورەی كۆمەڵایەتی دروست دەكات.