بڕیارێكى به‌په‌له‌ له‌ڕۆژئاواى كوردستانه‌وه‌

ئیدارەی ڕۆژئاوای کوردستان له‌بڕیارێكى به‌په‌له‌دا ده‌ڵێت، "بەهۆی زیادبوونی مەترسییەکانی داعش‌و قۆستنەوەی گردبوونەوەی خەڵک بەبۆنەی ساڵیادی ڕووخانی دەسەڵاتی بەعس لەسووریا، ڕۆژانی 7و 8ی ئەم مانگە هەموو جۆرە کۆبوونەوە، چالاکی جەماوەریی‌و کۆمەڵایەتییەکان‌و بەکارهێنانی چەک‌و یاری ئاگرین لەهەموو ناوچەکان قەدەغەیە".

سەرلەبەیانی ڕۆژی 8ی 12ی ساڵی 2024و دوای 53 ساڵ لەحوکمی باوکی‌و دواتر خۆی، دەسەڵاتی بەشار ئەسەد ڕووخاو ناوبراو بەرەو ڕووسیا هەڵهات بەوەش قۆناغێکی نوێ لەسووریا دەستیپێکرد، بۆ یەکەم ساڵیادی ڕووخانی دەسەڵاتی بەعسیش، ئەحمەد شەرع سەرۆکی سووریا داوای لەسەرجەم خەڵکی وڵاتەکەی کردووە لەو ڕۆژەدا بچنەسەر شەقام‌و ئاهەنگ‌و خۆشی خۆیان دەرببڕن.

دەستەی ناوخۆی سەر بەئیدارەی خۆسەری باکوورو ڕۆژهەڵاتی سووریا ئەمڕۆ شەممە نووسراوێکی بڵاوکردەوەو باسی لەوەکردووە، بۆ تێپەڕبوونی ساڵێک بەسەر ڕووخانی بەعس پیرۆزبایی لەگەلانی سووریا دەکات‌و ئومێدەوارە سووریا ساڵ بەساڵ زیاتر بەرەو خۆشگوزەرانی بڕوات‌و هەمووان لەناو سیستەمێکی فرەیی‌و ناناوەندیدا بەئازادانە پێکەوەبژین.

ئەوەشیخستووەتەڕوو، لەم قۆناغەدا بەهۆی ئەوەی هەڕەشەی شانە نوستووەکانی داعش زیادیانکردووەو لەوانەیە ئەم یادە بۆکردنە ئامانجی خەڵک بقۆزنەوە، بۆیە بڕیاردراوە ڕۆژانی 7و 8ی ئەم مانگە لەهەموو ناوچەکانی باکوورو ڕۆژهەڵاتی سووریا هەموو جۆرە کۆبوونەوە، چالاکی جەماوەریی‌و کۆمەڵایەتییەکان‌و بەکارهێنانی چەک‌و یاری ئاگرین قەدەغە بکرێت‌و ئەوانەی سەرپێچی دەکەن ڕووبەڕووی لێپرسینەوە دەبنەوە.