شۆفێران ئاگادارده‌كرێنه‌وه‌.. دره‌نگانى ئه‌مشه‌و تاوه‌كو به‌ره‌به‌یان گونجاو نییه‌ بۆ هاتوچۆكردن

هۆشداریدەدرێتە هاووڵاتییان‌و شۆفێران كە لەكاتژمێر 12ی ئەمشەوەوە تاوه‌كو به‌ره‌به‌یان تەمومژ دروستدەبێت، هەروەها سبەینێ دووشەممە سەرمایەكی بەتین ڕوو لەهەرێم دەكات بەشێوەیه‌ك، پلەكانی گەرما بۆ ژێر پلەی سفری سیلیزی دادەبەزن.

هەڤاڵ سدیق گەڵۆزی شارەزای كەشناسی ڕایگەیاند، ئەمشەو لەکاتژمێر 12 بەدواوە بەهۆی نزمبوونەوەی پلەکانی گەرماو بەرزی شێی ڕێژەیی لەهەوا، لەبەشێکی زۆری ناوچەکانی دهۆک‌و مووسڵ‌و هەولێر‌و کەرکووک‌و سۆران‌و سلێمانی‌و ڕاپەڕین‌و هەڵەبجە‌و بەشێک لەناوچەکانی گەرمیان، ئەگەری ڕوودانی دیاردەی تەمومژ هەیە.

ڕاشیگەیاند، لەئێوارەی سبەی دووشەممەوە بارستە هەوایەکی ساردی جەمسەری باراناوی لەسیبیریاوه ڕوو لەوڵاتانی ناوچەكەو هەرێم‌و عێراق دەكات.

وتیشی، بەهۆی ئەم بارستە هەوایە ساردەوە ڕۆژانی سێشەممەو چوارشەممە نمەباران بۆ بارانی مامناوەند دەبارێت‌و لەهەندێك شوێن هەورەبروسکەشی لەگەڵدا دەبێت، هەروەها لەناوچە شاخاوییەکانیش بەفر دەبارێت.

ئه‌وه‌شى وت، "لەم ماوەیەدا بەتایبەت لەكاتەكانی شەواندا پلەکانی گەرما ژمارەیەکی پێوانەیی تۆماردەکەن بەتایبەت لەناوچە شاخاوییەکان دەگاتە خوار سفری سیلیزی".

شارەزاكەی كەشناسی ئاماژەی بەوەشدا، ئەم شەپۆلە هەوا ساردە تاوه‌كو ڕۆژی هەینی داهاتوو بەردەوامدەبێت.