کۆبوونەوەی شاندی ئیمڕاڵی‌و باخچەلی چی تێدا باسكرا؟

شاندی ئیمراڵیی پارتی یەکسانی‌و دیموکراسیی گەلان (دەم پارتی)‌و دەوڵەت باخچەلی سەرۆکی گشتی پارتی بزووتنەوەی نەتەوەپەرست (مەهەپە)، کۆبوونەوە. لەدوای کۆبوونەوەکە، دەوڵەت باخچەلی‌و پەروین بوڵدان لێدوانی گرنگیاندا.

پەروین بوڵدان وتی، "لەگەڵ باخچەلی کۆبووینەوە، سوپاسی دەکەین، دەمانەوێت بڵێین کۆبوونەوەیەکی بەرهەمدارمان ئەنجامدا، قۆناغەکانی پێشکەوتنی پرۆسەکەمان تاووتوێکردو باسمان لەوەکرد، کە چی پێویستە بکرێت، کۆبوونەوەیەکی زۆر گرنگ، بەنرخ‌و بەهادار بوو".

وتیشى، "وەک قۆناغێک، پێمانوایە پێویستە لەسەر زەمینەیەکی نوێ پێشبکەوین، پێویستە بڵێین کە چووینەتە قۆناغی دووەم، پێویستمان بەڕێکخستنی یاسایی هەیە، بێگومان دەبێت یاسای ئاشتی دەربکرێت، لەمەودوا، کارەکانی کۆمیسیۆن‌و پارتە سیاسییەکان لەسەر ئەم ئاستە گرنگ دەبن".

دواتر دەوڵەت باخچەلیش لەوەڵامدا وتی، "خاتوو پەروین، هەموو بابەتەکانی بەڕوونی دەربڕی، واژۆ لەسەر هەموو وشە بەوشەی دەکەم".