شارەزایانی ئاو: بەنداوەکانی عێراق توانای عەمبارکردنی 100 ملیار مەتر سێجا ئاویان هەیە.. بەم دوو شەپۆلی بارانە 3.5 ملیار سێجا ئاو عەمبارکراوە

عادل موختار شارەزاو پسپۆڕی ئاو ڕایده‌گه‌یه‌نێت، "بارانبارینی ئەمدواییانەی ناوچەکانی هەرێمی کوردستان‌و باکوری ڕۆژهەڵاتی عێراق بەشێوەیەکی ڕاستەوخۆ دەبێتە هۆی بەهێزکردنی کۆگای ئاوی بەنداوەکانی ئەو ناوچەیە".

موختار ڕوونیکردووه‌تەوە، بەهۆی ئەم دوو شەپۆلەی بارانبارینەی ئەمدواییە، بەنداوەکانی عێراق نزیکەی 3.5 ملیار مەتری سێجا ئاویان کۆکردووه‌تەوە، ئەمەش بە"ئاماژەیەکی باش" دادەنرێت بۆ وەرزی بارانبارینێکی باش، بەتایبەت کە به‌نداوەکان توانای عەمبارکردنی زیاتر لە 100 ملیار مەتری سێجایان هەیە.

هەروەک داوای لەوەزارەتەکانی سەرچاوە ئاوییەکان‌و کشتوکاڵ کردووە کە بەڕێوەبردنێکی ژیرانەی ئاو پەیڕەوبکەن‌و دووربکەونەوە لەسیاسەتە هەڵەکان لەکۆگاکردن‌و دابەشکردن.

لەکۆتاییدا جەختی لەسەر پێویستیی گۆڕانکاریی لەپلانە کشتوکاڵییەکان‌و بەکارهێنانی تەکنیکەکانی نوێی ئاودێری کردەوە بۆ کەمکردنەوەی بەفیڕۆدانی ئاو.