عێراق موچەی زیاتر لە پێنج هەزار کەسی بڕى

ناوەندی هەواڵ

ڕاوێژکاری سەرۆک وەزیرانی عێراق بۆ کاروباری چاودێری کۆمەڵایەتی  ڕایگەیاندوە، مووچەی پێنج هەزار و 200 کەس لە تۆڕی پاراستنی کۆمەڵایەتی ڕاگیراوە کە دەستەبەری کۆمەڵایەتییان هەیە.

سەنا موسەوی، ڕاوێژکاری سەرۆک وەزیرانی عێراق بۆ کاروباری چاودێری کۆمەڵایەتی ڕایگەیاندوە، موچەی پێنج هەزار و 200 کەس لە تۆڕی پاراستنی کۆمەڵایەتی راگیراوە بەهۆی ئەوەی ناویان لە دەستەبەری کۆمەڵایەتیدا هەبوە و تۆمارکراون.

وتیشی، لە هەردوو کەرتی حکومی و تایبەت دەستەبەری کۆمەڵایەتی هەیە و پێویستە هۆشیاری و ڕێنمایی زیاتر بە کرێکارانی کەرتی تایبەت بدرێت بۆ ئەوەی لە چوارچێوەی یاسای دەستەبەری کۆمەڵایەتی خۆیان تۆماربکەن.

لەبارەی گرنگی یاسای تۆڕی پاراستنی کۆمەڵایەتی باسی لەوەکردووە، تۆڕى پاراستنى کۆمەڵایەتی مووچەیەکى هەمیشەیى نیە بەڵکو هاوکارییە، ئەگەر گەنجێک کاری بۆ بدۆزرێتەوە و ڕەتیبکاتەوە، موچەی تۆڕى پاراستنى کۆمەڵایەتییەکەی دەبڕدرێت.