عێراق هەناردەی نەوتی لە گەرووی هورمزەوە گەیاندووەتە دوو ملیۆن بەرمیل

وتەبێژی وەزارەتی نەوتی عێراق ڕایگەیاند، لەسەر فەرمانی عەلی زەیدی سەرۆكوەزیران، سەرقاڵی گرتنەبەری رێوشوێنی بە پەلەن بۆ بەرزكردنەوەی ئاستی هەناردەكردنی نەوت، وتیشی هەناردەی نەوت لە ڕێی توركیاوە دەگەیەننە 750 هەزار بەرمیل لە رۆژێكداو لە باشوریش دوو ملیۆن بەرمیلی رۆژانەی تێپەڕاندووە.

سەلیم ركابی، وتەبێژی وەزارەتی نەوتی عێراق رایگەیاند، لەسەر فەرمانی عەلی فالح زەیدی، سەرۆكوەزیرانی عیراق بۆ دۆزینەوەی رێگەچارەی ریشەیی و بەپەلە بۆ قەیرانی هەناردەكردنی نەوت، كە بەهۆی گرژییەكانی لە گەرووی هورمز هاتووەتە ئاراوە، وەزارەتەكەیان هەنگاو دەنێت بۆ بەرزكردنەوەی ئاستی هەناردەكردنی نەوت، لەو چوارچێوەیەشدا سەرقاڵی گرتنەبەری رێوشوێنی بەپەلەن بۆ زیادكردنی هەناردەكردن لە رێگەی هێڵی جەیهانەوە بۆ توركیا و بەندەرەكانی باشور.

سەلیم ركابی بە ئاژانسی "ریانۆڤستی" ڕووسی وتووە، عێراق ئامانجی ئەوەیە هەناردەكردنی لە ڕێگەی جەیهانەوە بۆ 750 هەزار بەرمیل لە رۆژێكدا زیاد بكات، لەڕێی گواستنەوەی نەوتی خاو بە تانكەر لە كێڵگەكانی باشورەوە، ئەوە لەكاتێكدایە هەناردەی لە بەندەرەكانی باشورەوە رۆژانە دوو ملیۆن بەرمیلی تێپەڕاندووە.

وتەبێژەكەی وەزارەتی نەوتی عێراق، ئاماژەی بەوەشكردووە، پلانەكانی داهاتوو بریتین لە درێژكردنەوەی بۆرییەكانی گواستنەوەی نەوت بۆ توركیا و سووریا، ئەمە جگە لە زیادكردنی هەناردەكردنی بەرهەمە نەوتییەكان و كبریت بۆ بەهێزكردنی داهاتی دەوڵەت.