ڕێککەوتنی سیاسی بۆ تێپەڕاندنی خشتەکان؛ بۆچی سەردانەکەی وەفدی هەرێم بۆ بەغدا یەکلاکەرەوەیە؟

دانوستانەکانی نێوان هەولێر و بەغدا چوونەتە قۆناغێکی هەستیار و چارەنووسسازەوە، دوای ئەوەی وەفدێکی باڵای حکومەتی هەرێمی کوردستان بە ئامانجی جێگیرکردنی شایستە داراییەکانی هەرێم لە ڕەشنووسی پرۆژەیاسای بودجەی گشتیی عێراق بۆ ساڵی ٢٠٢٧ گەیشتنە بەغدا. بەپێی زانیارییەکان، هەرێمی کوردستان بە پاکێجێکی دارایی بە بڕی ٢٩ ترلیۆن دینار بەشداری لە پرۆسەی داڕشتنی ڕەشنووسەکەدا دەکات.

وەفدە باڵەکەی هەرێم لە ئاوات شێخ جەناب وەزیری دارایی، ئومێد سەباح سەرۆکی دیوانی ئەنجوومەنی وەزیران، ئامانج ڕەحیم سکرتێری ئەنجوومەنی وەزیران و عەبدولحەکیم خەسرۆ سەرۆکی فەرمانگەی هەماهەنگی و بەدواداچوون پێکهاتووە. ئامانجی سەرەکیی وەفدەکە جێگیرکردنی شایستە داراییەکانی مووچەخۆران و داواکارییەکانی پەیوەست بە دامەزراندنی مامۆستایان و فەرمانبەرانی گرێبەستە لەناو یاساکەدا.

گەرماوگەرمی ئەم دانوستانانە لە کاتێکدایە کە لیژنەی پلانی ستراتیژی لە ٦ی ئەیلوولەوە دەستی بە نووسینەوەی ڕەشنووسەکە کردووە و بڕیارە تا ١٥ی ئەم مانگە ڕادەستی ئەنجوومەنی وەزیرانی عێراقی بکات. گرنگیی ئەم گەڕەی دانوستانە لەوەدایە کە فالح ساری، وەزیری دارایی عێراق لەگەڵ سەرۆکوەزیران و چوارچێوەی هەماهەنگی گەیشتووەتە ڕێککەوتنێک بۆ ئەوەی خشتەکانی بودجەی ٢٠٢٧ بەبێ دەستکاری لە پەرلەمان تێپەڕێنرێن؛ ئەمەش وادەکات هەر جێگیرکردنێک پێویست بێت لە ئێستاوە لە ڕەشنووسی حکومەتدا بچەسپێنرێت.

دیلان غەفور، ئەندامی ئەنجومەنی نوێنەرانی عێراق رایگەیاندووە، لەگەڵ گەیشتنی پرۆژەکە بۆ پەرلەمان، نوێنەرانی کورد داكۆكیكارێكی سه‌رسه‌خت دەبن بۆ پاراستنی مافە داراییەکان. چاودێران پێیانوایە ئەم یەک هەفتەیەی پێش ئیستحقاقی ١٥ی ئەیلوول، دوا دەرفەتی جدییە بۆ هەولێر تا بتوانێت کێشە هەڵپەسێردراوەکانی مووچە و بودجە لە بنەڕەتەوە چارەسەر بکات.

گرنگترین زانیاریی و ئامارەکان  

·        بڕی داواکراوی هەرێمی کوردستان: ٢٩ ترلیۆن دینار.

·        کاتی کۆتاییهاتنی ڕەشنووسەکە: ١٥ی ئەیلوولی ٢٠٢٦ (بەرزکردنەوە بۆ ئەنجوومەنی وەزیران).

·        دەستپێکی کارەکانی لیژنەی پلان: ٦ی ئەیلوولی ٢٠٢٦.

·        تەوەرە سەرەکییەکانی گفتوگۆ: مووچە، پشکی هەرێم، و دامەزراندنی مامۆستا و فەرمانبەرانی گرێبەست.