هاوپەیمانیی هێزەکانی ڕۆژهەڵاتی کوردستان: هێرشەکانی ئێران ئیرادەمان نالەرزێنێت

ئیرادە میدیا

هاوپەیمانیی هێزەکانی ڕۆژهەڵاتی کوردستان: هێرشەکانی ئێران ئیرادەمان نالەرزێنێت

هاوپەیمانیی هێزە سیاسییەکانی ڕۆژهەڵاتی کوردستان سەبارەت بە بەردەوامیی هێرشەکانی ئێران  لە ڕاگەیەندراوێکدا ئاماژەیان بەوەداوە"ئەم هێرشانە و گیانبەختکردن و قوربانیدانی هێزەکانمان نەک هەر ئیرادەمان نالەرزێنێت، بەڵکو باوەڕمان بە ڕەوایی خەبات بۆ ڕزگاریی کوردستان قایمتر دەکات".

هاوپەیمانیی هێزە سیاسییەکانی ڕۆژهەڵاتی کوردستان لە ڕاگەیەندراوەکەیاندا، داوا لە ڕای گشتی نێونەتەوەیی و نەتەوە یەکگرتووەکان و حکومەتی عێراق دەکات بە زوویی هەڵوێستی ڕاستەقینە لەبەرامبەر هێرشە بەردەوامەکانی ئێران بەرامبەر کەمپەکانی ڕۆژهەڵات لە باشوور بگرنەبەر.
دەقی ڕاگەیەندراوی هاوپەیمانیی هێزە سیاسییەکانی ڕۆژهەڵاتی کوردستان:

 "ڕژێمی تیرۆریستیی کۆماری ئیسلامیی ئێران بە مەبەستی پەردەپۆشکردنی شکستە سیاسی و سەربازیی و ستراتیژیی و ئایدۆلۆژییەکانی لە ماوه‌ی شه‌ڕی ٣٩ ڕۆژه‌‌ی له‌گه‌ڵ ئه‌مریکا و ئیسرائیلدا، بە بەردەوامی هێرشی کردووەتە سەر بنکە و بارەگاکانی حیزبەکانی ڕۆژهەڵاتی کوردستان و کەمپی نیشتەجێبوونی بنەماڵەکانی خاوخێزانی کادر و پێشمەرگەکانیان لە هەرێمی کوردستان و تەنانەت لە ماوەی ئاگربەسی ئێستاشدا ئەو هێرشانە هەر درێژەیان بووە. لە  نوێترینی ئەو هێرشانەشدا کە رۆژی ڕابردوو ٢٨ی خاکەلێوەی ١٤٠٥ (١٧ـی نیسانی ٢٠٢٦) بە مووشەک و درۆن هێرش کرایە سەر کەمپە مەدەنییەکان و بارەگاکانی حیزبی دیموکراتی کوردستانی ئێران؛ مخابن سێ پێشمەرگە و تێکۆشەری ڕێگای ئازادیی ئەم حیزبە بە ناوەکانی شاهین ئازەربەرزین، نەدا میری و سەمیرا ئەڵڵایاری شەهید بوون و دوو پێشمەرگەیەکی دیکەش بریندارن.

کۆماری ئیسلامیی ئێران پێشتریش جگە لە بنکە و بارەگای حیزبە سیاسییەکانی ڕۆژهەڵاتی کوردستان و شوێنی نیشتەجێبوونی بنەماڵەکانیان، بە بەردەوامی هێرشی کردووەتە سەر هەرێمی کوردستان کە بەداخەوە ئەو هێرشانەش ١١ شەهید و قوربانیی لێ کەوتبووەوە.

هاوپەیمانیی هێزە سیاسییەکانی کوردستانی ئێران، وێڕای مەحکوومکردنەوەی توندی ئەم تاوانە و سه‌رجه‌م هێرشه‌ تێرۆریستیه‌کانی کۆماری ئیسلامی بۆسه‌ر تێکۆشه‌رانی ڕۆژهه‌ڵات و شه‌هیدکرانی ١٠ ڕۆڵه‌ی تێکۆشه‌ری حیزبه‌کانی ئه‌ندامی هاوپه‌یمانیی ڕایدەگەیەنێت:

١. ڕوو لە حکوومەتی عێراق دەکەین و ڕایدەگەیەنین پێویستە هەڵوێست و کاردانەوەی جدییان هەبێ و هەنگاوی بەکردەوە، یاسایی و ڕاشکاوانە بنێن بۆ پاراستنی گیانی پەنابەرانی سیاسی و ڕێگریکردن لە دووبارەبوونەوەی ئەم تاوانانە. پاراستنی سەروەریی خاک و گیانی نیشتەجێبووانی هەرێم، ئەرکێکی دەستوورییە، بەتایبەت کە ئەوە کۆماری ئیسلامیی ئێرانە ڕێککەوتننامەی ئەمنییەتیی نێوان دوو وڵاتی پێشێل کردووە.

٢. ڕەخنەی توند لە نوێنەرایەتیی ڕێکخراوی نەتەوە یەکگرتووەکان لە عێراق و هەرێمی کوردستان دەگرین و پێمان‌وایە بێدەنگی و پاسیڤ‌بوونی ئەوان لە بەرامبەر ئەم تاوانە جەنگییانە و پشتگوێخستنی ئەرکە مرۆییەکانیان، دەستی ڕژێمی تارانی بۆ دەستدرێژی و تیرۆری زیاتر ئاوەڵاتر کردوه‌. داوا دەکەین و پێویستیشە ئەم هێرشانە وەک تاوانی جەنگ و تیرۆری نێودەوڵەتی لەقاو بدرێن، تۆمار بکرێن و هەڵوێستیان لە سەر بگیرێ.

٣. بە توندی ڕەخنە لە سیاسەتی ساتوسەودای وڵاتان لەگەڵ کۆماری ئیسلامی دەگرین و پێ لەسەر ئەو ڕاستییە دادەگرینەوە کە ئەم ڕژێمە دیکتاتۆرە ئەمنییەت و سەقامگیریی هەموو جیهانی بە بارمتە گرتووە و هەموو کاتێک دانوستان و سازان لەگەڵ کۆمەڵگەی جیهانیی بۆ کڕینی کات و بردنەپێشی ئامانجەکانی قۆستۆتەوە. بۆیە کاتی ئەوە هاتووە ئەنجوومەنی ئاسایشی نەتەوە یەکگرتووەکان کاردانەوەی خێرای هەبێ و کۆمەڵگەی نێونەتەوەیی بە سازان لەگەڵ تاران چیدی دەستی ڕژێم بۆ بەردەوامیی تیرۆر و کوشتار ئاوەڵاتر نەکات.

٤. داوا لە هەموو کوردانی دانیشتووی دەرەوەی وڵات دەکەین بە پلان و بەرنامەی تۆکمە، به‌ ڕێکخستنی ئاکسیۆن و ڕێپێوانی هێمنانە و بەشێوەی بەردەوام بێنە سەر شەقامەکان و بە کۆبوونەوە لە بەردەم باڵوێزخانە و کۆنسوولگەرییەکانی ڕژێم و ناوەندەکانی بڕیار دەنگی بێزاری نەتەوەکەمان بەرز بکەنەوە.

لە کۆتاییدا هاوپەیمانیی هێزه‌ سیاسییه‌کانی کوردستانی ئێران جارێکی دیکە دۆست و دوژمن دڵنیا دەکاتەوە ئەم هێرشانە و گیانبەختکردن و قوربانیدانی هێزەکانمان نەک هەر ئیرادەمان نالەرزێنێت، بەڵکوو باوەڕمان بە ڕەوایی خەبات بۆ رزگاریی کوردستان و ڕووخانی ئەم ڕژێمە و سووربوونمان لەسەر بەردەوامیی خەباتەکەمان قایمتر دەکات.

نەمری بۆ شەهیدان و سەرکەوتن بۆ ڕێگای ئازادی."