حوسییەکان خستنەخوارەوەى فڕۆکەیەکى ئەمریکایان راگەیاند

ناوەندی هەواڵ

حوسییەکانی یەمەن ڕایانگەیاند، فڕۆکەیەکی بێفڕۆکەوانی ئەمریکییان لە ئاسمانی پارێزگای مەئرەب خستووەتە خوارەوە لە جۆری MQ-9، کە نرخێکی خەیاڵی هەیە.

یەحیا سەریع، وتەبێژی سەربازی حوسییەکان لە یەمەن ڕایگەیاندووە، گرووپی یەمەن فڕۆکەیەکی بێفڕۆکەوانی ئەمریکی"9 MQ" یان خستووەتە خوارەوە کە نرخەکەی 30 ملیۆن دۆلارە، لەکاتێکدا لە ئاسمانی پارێزگای مەئرەب چالاکیی دوژمنکارانەی ئەنجامدەدا.

ئاماژەی بەوەشکردووە، ئەمە هەشتەمین فڕۆکەی ئەم جۆرەیە کە گروپە چەکدارەکە سەرکەوتوو بووە لە خستنەخوارەوە.

حوسییەکانی یەمەن، لە تشرینی دووەمی 2023وە لە دەریای سووردا بەردەوام هێرش دەکەنە سەر کەشتییە ئیسرائیلییەکان یان ئەوانەی بەرەو ئیسرائیل دەڕۆن، ئەوەش وەک بۆ پشتیوانی لە غەززە و گەلی فەلەستین.

حوسییەکان زیاتر لە 70 هێرشیان ئەنجامداوە، لەو ماوەیەدا دوو کەشتییان نوقم کردوە و دەستیان بەسەر یەکێکدا گرتووە.

لە بەرامبەریدا ئەمریکا و هاوپەیمانەکانی هێزێکی سەربازییان پێکهێنا بۆ مامەڵەکردن لەگەڵ هێرشەکانی حوسییەکان، بە فڕۆکە چەندین هێرشیان کردووەتە سەر ناوچە جیاجیاکانی یەمەن، لەکاتێکدا سوپای ئەمریکا ناوبەناو ئەرکە سەربازییەکانی لە ناوچەکە ئەنجام دەدات.