مووچەى شەهیدانى شەڕی روبەروبوونەوەی تیرۆر دەخرێتە سەر دامەزراوەى شەهیدانى عێراق

ناوەندی هەواڵ

پەرلەمانتارێکى ئەنجوومەنى نوێنەرانى عێراق رایگەیاند، بەپێی هەمواری یاسای دامەزراوەی شەهیدانی عێراق کە ئێستا پەرلەمانی عێراق پەسەندی کرد، مووچەى شەهیدانى شەڕی روبەروبوونەوەی تیرۆر دەخرێتە سەر دامەزراوەى شەهیدانى عێراق.

کاروان یاروەیس ئەندامى ئەنجوومەنى نوێنەرانى عێراق رایگەیاند، ئەو پێشمەرگە و ئاسایش و هێزەکانی ناوخۆ، کە لە شەڕی رووبەروبونەوەی تیرۆر لەناوچەکانی دەرەوەی هەرێمی کوردستان واتا لە کەرکوک و خانەقین و خورماتوو و موسڵ و هەر ناوچەیەکی تر عێراق شەهید بوون  مووچەیان دەخرێتە سەر دامەزراوەی شەهیدانی عێراق.

دەشڵێت، ئەو شەهیدانەی کە وەزارەتی شەهیدان و کاروباری ئەنفالکراوانی هەرێم تۆمارکراون و نیشتەجێی پارێزگاکانی دەرەوەی هەرێمن هەموو ئیمتیازاتی دامەزراوەی شەهیدانی عێراق دەیانگرێتەوە تەنها گواستنەوەی مووچەکەیان نەبێت.