دەوڵەتى یاسا: بەهۆى ئەمەریکاوە ئیسرائیل هێرش ناکاتەسەر عێراق

ناوەندی هەواڵ

هاوپەیمانى دەوڵەتى یاسا ئاشکرایدەکات کە فشارەکانى ئەمەریکا هۆکارن بۆئەوەى ئیسرائیل هێرش نەکاتە سەر عێراق وهەر هێرشێک کاریگەریی ڕاستەوخۆى لەسەر پەیوەندییەکانى بەغداد و وانشتۆن دەبێت.

سەعد مەتڵەبى، سەرکردە لە هاوپەیمانى دەوڵەتى یاسا بەمیدیاکانی وتووە، تا ئێستا ئیسرائیل هیچ هێرشێکى بۆسەرعێراق ئەنجامنەداوە وەک وەڵامێک بۆ هێرشى بەردەوامیى گروپە چەکدارەکان بۆسەریان. 

ئاشکراشیکردووە، هۆکارى بێدەنگى ئیسرائیل بەرامبەر عێراق ئەو فشارانەیە کە ئەمەریکا خستویەتییە سەرى و ڕێگەى نادات هیچ هێرشێک بکات و ترسى لە گرژبونى پەیوەندییەکانى نێوانمان هەیە.

ئاماژەی بەوەشکردووە، کە لەنێوان عێراق و ئەمەریکا ڕێککەوتنى هاوبەشى ئەمنی هەیە و هەر ئەوەش هۆکارى ئەو فشارانەیە کە لەسەر ئیسرائیل دروستیکردوە.