لە رۆژانی سەرژمێریدا قەدەغەی هاتووچۆ رۆژنامەنووسان ناگرێتەوە

ناوەندی هەواڵ

سەندیکای ڕۆژنامەنوسانی کوردستان ڕایگەیاند، سەرجەم ڕۆژنامەنوسانی هەرێم كە هەڵگری ناسنامەی سەندیکا یاخود دەزگاکانی خۆیانن، قەدەغەی هاتوچۆ نایانگرێتەوە.

بڕیارە رۆژانی 20 و 21ـى تشرینى دووەمى 2024، سەرژمێریی گشتی لە عێراق و هەرێمی کوردستان بکرێت و هەردوو رۆژەکەش هاتوچۆ قەدەغە دەبێت.

ئەمڕۆ یەكشەممە لە ڕاگەیەندراوێكدا ئەنجومەنی سەندیکای ڕۆژنامەنوسانی کوردستان، بڵاویكردەوە، "بە گوێرەی نوسراوێکی وەزارەتی پلاندانانی هەرێمی کوردستان ژمارە 777 لە بارەی ڕێنماییەکانی قەدەغەی هاتوچۆ لە ڕۆژانی سەرژمیریی گشتیی دانیشتوان، هەروەها نوسراوی دەستەی ئاماری عێراق، تایبەت بە قەدەغەی هاتوچۆ و لە نوسراوی وەزارەتی پلاندانان (دەستەی باڵای سەرژمێری دانیشتوانی هەرێم)، سەرجەم ڕۆژنامەنوسانی هەرێمی كوردستان كە هەڵگری ناسنامەی سەندیکا یاخود دەزگاکانی خۆیانن، قەدەغەی هاتوچۆ نایانگرێتەوە، تاکو بتوانن ئەرکەکانی خۆیان بکەن".

لە راگەیەندراوەکەدا  داوا لە ڕۆژنامەنوسان دەكات جگە ڕاپەڕاندنی ئەركەكانی خۆیان لە ڕۆژانی قەدەغەی هاتوچۆدا، وەك ئەركێكی نیشتیمانی بەشداری سەرژمێری دانیشتوان بكەن.

بەگوێرەی ڕاگەیەندراوەكە، سەرجەم لق و نوسینگەكانی سەندیكا لە سەرجەم شار و ئیدارە سەربەخۆكان هەرێم كوردستان ڕاسپێردراون بۆ ئەوەی لەگەڵ هێزە ئەمنیەكان لە هەماهەنگیدابن بۆ هاوكاریكردنی پەیامنێران و تیمەكانی راگەیاندن.