وردەكاری ژێرئاوكەوتنی بەلەمێكی كۆچبەران لە ئیجە

ناوەندی هەواڵ

بەلەمێكی كۆچبەران لە دەریای ئیجە و لەنزیك كەناراوەكانی یۆنان ژێرئاوكەوت، هەشت كۆچبەر گیانیان لەدەستداوە كە شەشیان منداڵن و دووانەكەی دیكەشیان ژنن.

حسێن حەمە ساڵح نوێنەری دەزگای لوتکە لە یۆنان بە "ئیرادە میدیا" ی وت "بەیانیی ئەمڕۆ دووشەممە، 25.11.2024، بەلەمێكی پڕ لە كۆچبەر لە باكووری كەناراوەكانی دوورگەی سامۆسی یۆنانی لە رۆژهەڵاتی دەریای ئیجە ژێرئاو كەوتووە، تیمەكان 39 كۆچبەریان رزگار كردووە".

 وتیشیپاسەوانی دەریایی یۆنان بەردەوامن لە گەڕان و پشكنین بۆ دۆزینەوەی كۆچبەرانی دیكە كە لەنێو بەلەمەكەدا بوون، بەڵام تاوەكو ئێستا ناسنامەی كۆچبەرەكان ئاشكرا نەكراون.

ئەو رێگەیەی بەلەمەكەی تێدا ژێرئاو كەوتووە، یەكێكە لەو رێگە قەرەباڵغانەی كۆچبەران لە توركیاوە بۆ گەیشتن بە یۆنان بەكاریدەهێنن.

 بەگوێرەی ئاماری فەرمیی حكومەتی یۆنان، چوونی كۆچبەران لەڕێگەی دەریاوە بۆ ئەو وڵاتە 25٪ زیادیكردووە.

بەگوێرەی ئاماری رێكخراوی نەتەوە یەكگرتووەكان، لەسەرەتای ئەمساڵەوە، زیاتر لە 175 هەزار كۆچبەر روویان لە وڵاتانی ئەورووپا كردووە كە زیاتر لە 166 هەزاریان لەرێگەی دەریاوە خۆیان گەیاندووەتە ئەوروپا.

بەپێی ئەو ئامارە، زیاتر لە 54 هەزاریان روویان یۆنان كردووە، زۆرترینیشیان بۆ ئیتاڵیا بووە كە زیاتر لە 60 هەزار بوون و هەر ئەمساڵیش، تائێستا دوو هەزار و 214 كۆچبەر لەرێگەی دەریا بۆ گەیشتن بە وڵاتانی ئەورووپا گیانیان لەدەستداوە یان بێسەروشوێن بوون.