دەست بەسەرداگرتنی ئۆتۆمبێلە بێسەرەتاکان لە سلێمانی ڕاگیرا

ناوەندی هەواڵ

ئەنجومەنی خاوەن ئۆتۆمبێلە بێسەرەتاکان لەگەڵ سەرۆکی یەکێتی کۆبوونەوە و بڕیادرا ڕێوشوێنەکانی دەستگرتن بەسەر ئەو ئۆتۆمبێلانە ڕابگیرێت و لەمڕۆوە بگەڕێنەوە بۆ سەر شەقامەکان.

ئەمڕۆ پێنجشەممە، ئەنجومەنی خاوەن ئۆتۆمبێلە بێسەرەتاکان دوای کۆبوونەوەیان لەگەڵ بافڵ تاڵەبانی، سەرۆکی یەکێتیی نیشتمانیی کوردستان ڕایگەیاند، بڕیار درا ڕێوشوێنەکان بە شێوەیەکی کاتیی ڕابگیرێن و لەمڕۆوە ئۆتۆمبێلە بێسەرەتاکان دەگەڕێنەوە سەر شەقامەکان.

ڕوونیشیکردەوە کە لیژنەیەک لە نوێنەری سەرۆکی یەکێتی، جێگری سەرۆکی حکومەت و دەزگا ئەمنییەکان و بەشی یاسایی پێکدەهێنرێت بۆ دۆزینەوەی میکانیزمێکی یاسایی بۆ چارەسەرکردنی کێشەی ئۆتۆمبێلە بێسەرەتاکان.

ڕاشیگەیاند، ئەو ئۆتۆمبێلانەی پێشتر دەستیان بەسەرداگیرابوو دەگەڕێندرێنەوە بۆ خاوەنەکانیان بە مەرجێک تاوانیان پێ نەکرابێت.

سوارە عومەر، نوێنەری خاوەنی ئۆتۆمبێلە بێسەرەتاکان دەڵێت، کێشەی ئۆتۆمبێلە بێسەرەتاکان چارەسەرکرا و لە ئەمڕۆوە دەتوانن بێنەوە سەر شەقامەکان، بەڵام دەبێت پابەندی رێنماییەکان بن.