دیداری باشور بۆ ئایندەی رۆژئاوای كوردستان بەڕێوەچوو

ناوەندی هەواڵ

ئەمرۆ شەممە 25-1-2025 دیداری باشور بۆ ئایندەی رۆژئاوای كوردستان لە شاری سلێمانی دەستیپێكرد.
دیدارەكە لەلایەن نوێنەرایەتی پارتی یەكێتی دیموكرات "پەیەدە" لە شاری سلێمانی ڕێكخرابوو، كەسایەتی سیاسی و شرۆڤەكار و رۆژنامەوانان تێیدا بەشداربوون.
لە دیدارەكەدا لە ڕێگەی بەرنامەی زوومەوە و بەشێوەی ڤیدیۆ مەزڵوم عەبدی فەرماندەی گشتیی هەسەدە وتارێكی پێشكەش كرد.
مەزڵوم عەبدی ڕایگەیاند:"80 ساڵە كورد لە سوریادا مافی زەوت دەكرێت ئەمڕۆ دەرفەتێكی مەزن لە بەردەم گەلی كورددایە و یەكریزی كوردان زۆر گرنگە و پێویستە باشوری كوردستان بەشدارببێت لە بەدەستهێنانی مافەكانی كورد لە سوریا".
مەزڵوم عەبدی لە وتارەكەیدا وتی: "ئامانجمانە سووریایەكی ئارام و دیموكرات پێكبهێندرێت، 80 ساڵە كورد لە سوریادا مافی زەوت دەكرێت، ئەمڕۆ دەرفەتێكی مەزن لەبەردەم گەلی كورددایە بۆیە یەكڕیزی كوردان و تەبایی نێوماڵی كورد زۆر گرنگە".
فەرماندەی گشتیی هەسەدە بە پێویسیتشی زانی، باشووری كوردستانیش بەشدارببێت لەم تێكۆشانە و لە بەدەسهێنانی مافەكانی كورد لە سوریا.
زیاتر لە دوو مانگە گروپە چەكدارەكانی سەر بە توركیا لە باكوری سوریا هێرشی چڕیان بۆسەر ناوچەكانی ژێر دەسەڵاتی هەسەدە دەستپێكردووە، بەتایبەتیش بۆ دەوروبەری بەنداوی تشرین و پردی قەرەقۆزاق لە نزیك مەنبج، ئەو چەكدارانە دەیانەوێت بە پشتیوانی هێزی ئاسمانی و درۆنی توركیا بەنداوەكە داگیر بكەن و دواتریش پەلاماری كۆبانێ بدەن.
بەڵام شەڕڤانانی هێزەكانی سوریای دیموكرات بەرگریی چڕ لە بەنداوەكە و ناوچەكانی ژێر دەسەڵاتیان دەكەن، بەوەش پیلانی توركیا بۆ داگیركردنی ئەو ناوچانە شكستیهێناوە، خەڵكی هەرێمی كوردستان و رۆشنبیران و رۆژنامەنوسان دەخوازن لەسەر ئاستی جەماوەری پشتیوانی ڕۆژئاوای كوردستان بكرێت و سنورەكانی بەڕوودا بكرێتەوە.