پێش بەستنی کۆنگرەی پەکەکە، شاندی دەم پارتی لەگەڵ ئۆجەلان و ئەردۆغان کۆ دەبێتەوە

ناوەندی هەواڵ

بەشێک لەمیدیاکانی تورکیا بڵاویانکردووەتەوە، ئەم مانگە کۆنگرەی پەکەکە بۆ چەک دانان بەڕێوە دەچێت. بەر لەوەش شاندی دەم پارتی لەگەڵ عەبدوڵلا ئۆجەلان و سەرۆک کۆماری تورکیا کۆ دەبێتەوە.

پێنج مانگ لەمەوپێش، دەوڵەت باخچەلی، سەرۆکی گشتیی پارتی بزووتنەوەی ناسیۆنالیست (مەهەپە) داوای لە عەبدوڵلا ئۆجالان، ڕێبەری زیندانیکراوی پارتی کرێکارانی کوردستان (پەکەکە) کرد، پەکەکە هەڵبوەشێنێتەوە،دوای ئەو داواکارییەی باخچەلی  لە 27ی شوباتی ئەمساڵ، ئۆجەلان لە بانگەوازێکی مێژوویدا داوای لە پەکەکە کرد چەک دابنێت و بەگوێرەی یاساو پەیڕەوی حزبەکە خۆی هەڵبوەشێنێتەوە.

ئەگەر چی مانگێک زیاتر بەسەر بانگەوازەکەی ئۆجەلان تێپەڕیوە، بەڵام تا ئێستا داوکاریی چەکدانان لەلایەن پەکەکەوە جێبەجێ نەکراوە لەبەر ئەوەی دەستەی بەڕێوەبردنی پەکەکە داوای ئازادکردنی ئۆجەلان دەکەن و ڕایانگەیاندووە پێویستە ئۆجەلان خۆی سەرپەرشتی کۆنگرەو هەڵوەشاندنەوەی پەکەکە بکات.

بەپێی ڕاپۆرتێکی ماڵپەڕی خەبەرتورک، چاوەڕێ دەکرێت لە مانگی نیساندا کۆنگرەی پەکەکە بۆ مەبەستی چەک دانان بەڕێوە بچێت، بەر لەوەش شاندی ئیمرالی پارتی یەکسانی و دیموکراسیی گەلان (دەم پارتی) لەگەڵ ڕەجەب تەیب ئەردۆغان، سەرۆک کۆماری تورکیا کۆ دەبێتەوە، بۆ ئەو مەبەستەش لە چەند ڕۆژی ئاییندەدا، سەرۆکایەت
ی کۆمار تورکیا ڕێکەوتێک بۆ دەم پارتی دیاری دەکات.

بە پێی زانیاریی ماڵپەرەکە، دوای کۆبوونەوەی لەگەڵ ئەردۆغان، شاندی دەم پارتی سەردانی دوورگەی ئیمراڵی دەکەنەوە و بۆ چوارەمین جار چاویان بە عەبدوڵڵا ئۆجەلان دەکەوێتەوە.

هاوکات، سەرکردایەتی کەجەکە لە ڕاگەیەندراوێکدا بەبۆنەی 4ی نیسان ساڵرۆژی لەدایکبوونی ئۆجەلان ڕایگەیاندووە "گەل ئیدی دەیەوێت ئۆجەلان بەشێوەی ئازادکراوی لەنێو خۆیدا ببینێت و پێویستە ئازاد بکرێت."


چیدەم ئوچار، هاوسەرۆکی پارتی هەرێمە دیموکراتەکان (دەبەپە) ڕەخنەی لە دەسەڵات گرتووە و دەڵێت، دوڵەتی تورکیا لە بەرانبەر پرۆسەی ئاشتی بێدەنگ ماوەتەوە و ئەمەش مایەی قبووڵکردن نییە. دەسەڵات تا ئێستە لە بەرانبەر بانگەوازەکەی ئۆجەلان هەنگاوی کردەیی نەناوە.

پێشهاتەکان لە کاتێکدان پرۆسەیەکی نوێ لە تورکیا و باکووری کوردستان دەستی پێکردووە بەمەبەستی چارەکردنی پرسی کورد، دەسەڵات بە تورکیای بێتیرۆر و لایەنی کوردی بە پرۆسەی ئاشتی ناوزەندی دەکەن.