ئەمریكا.. لە تەکساس لافاوە و لە كالیفۆرنیاش ئاگر

ناوەندی هەواڵ

لە ویلایەتی تەكساسی ئەمریكا لافاو هەستاوە و تا ئێستا 24 كەس گیانیان لەدەست داوە، لە كالیفۆرنیاش 29 هەزار هێكتار زەوی سوتاوە و ئاگرەكە بەردەوامە.

شەوی ڕابردوو بارانی بەخوڕ چەند ناوچەیەكی ویلایەتی تەكساسی لە ناوەڕاستی باشوور گرتەوە و بووە هۆی دروستبوونی لافاو لە چەند ناوچەیەكی نیشتەجێبون، فەرماندەی پۆلیسی هەرێمی كیەر، ویلایەتی تەكساسیش ڕایگەیاندووە، بەهۆی لافاوەوە تا ئێستا 24 كەس گیانیان لەدەست داوە.

دەشڵێت، تا ئێستا 237 كەسیان ڕزگار كردووە، بەڵام سەدانی دیكە بێسەروشوێنن و لەنێویاندا 25 منداڵ هەن كە لە كاتی لافاوەكەدا لە كۆی 700 منداڵ لە خێوەتگەیەكی هاوینەدا بوون.

بەرپرسەكە جەختیشی كردەوە "هەڵمەتی گەڕان و ڕزگاركردن بەردەوامە و تیایدا 14 هەلیكۆپتەر و 12 درۆن و 500 ئەندامی تیمی ڕزگاركردن بەشدارن".

بەرپرسانی خۆجێیی تەكساس دەڵێن: لافاوەكە دوای دوو كاتژمێر لە بارانی بەخوڕ دروست بووە.

لەلایەكی دیكەوە، ئاگر لە چەند ناوچەیەكی ویلایەتی كالیفۆرنیا لە كەناراوەكانی ڕۆژاوای ئەمریكا كەوتووەتەوە و تا ئێستا زیاتر لە 29 هەزار هێكتار زەوی سووتاوە.