ئیسرائیل بەنیازە هەڵبژاردنەکانی عێراق تێكبدات

پوختە

لێدوانێکی سەرنجڕاکێشی موحسین ڕەزایی، فەرماندەی پێشوی سوپای پاسدارانی ئێران، سەبارەت بە نیازی ئیسرائیل بۆ تێکدانی هەڵبژاردنەکانی داهاتوی عێراق و کۆکردنەوەی پاشماوەکانی داعش بە هاوکاری لەگەڵ بەعسییەکان، زنجیرەیەک کاردانەوەی لە ناوخۆی عێراقدا بەدوای خۆیدا هێنا، لەوانەش هۆشدارییەکی سیاسی کە وڵاتەکە دەبێتە گۆڕەپانێک بۆ "ئۆپەراسیۆنە خۆڵەمێشیەکان" کە مەترسییەکی ڕاستەوخۆ بۆ سەر ئاسایشی گشتی و سەقامگیریی سیاسی دروست دەکات.

ئایا ململانێكانى ناوچە بۆ روبەڕوبونەوەى راستەوخۆ دەگۆڕدرێت؟

لەمبارەیەوە، عائید ئەلهیلالی، سیاسەتمەداری سەربەخۆ، لە لێدوانێكى دا بۆ كەناڵەكانى راگەیاندن جەختی لەوەکردەوە کە ناتوانرێت لێدوانەکانی موحسین ڕەزایی وەک هۆشداری تێپەڕین مامەڵەی لەگەڵدا بکرێت، ئاماژەی بەوەشدا کە وتەكانى رەزایى هەڵگری ڕەهەندی ئەمنی و ستراتیژین و پێدەچێت ڕەنگدانەوەی پەرەسەندنی ململانێی ناوچەکە لە گۆڕەپانی ناتەقلیدییەوە بگۆڕێت بۆ ڕوبەڕوبونەوەی ڕاستەوخۆ، لەوانەش شەڕی دەرونی، هاندان، تێکدانی سیاسی و ڕەنگە تەنانەت تیرۆرکردنی پێشوەختە.

هەڵبژاردنەکان لەسەر مێزی بەئامانجگرتن دان

موحسین ڕەزایی، فەرماندەی پێشوی سوپای پاسدارانی ئێران لە لێدوانەكەیدا ئەوەى ڕاگەیاندوە، كە ئیسرائیل لە هەوڵی تێکدانی هەڵبژاردنەکانی عێراقە یان دەستکاریکردنیان بە قازانجی خۆی، بێگومان ئەوەش بە تێکدانی سەقامگیریی ناوخۆ و کۆکردنەوەی گروپە توندڕەوەکان. ئەو پێیوابو شکستی ئیسرائیل لە بەئامانجگرتنی ڕاستەوخۆی ئێران ڕەنگە پاڵ بەوەوە بنێت بۆ ئەوەی بەدوای گۆڕەپانێکی بەدیلدا بگەڕێت و پێدەچێت عێراق زۆرترین ئەگەری ئەو کارە بکات.

ڕەزایی ئاماژەی بە نیازی کۆکردنەوەی هەزاران چەکداری داعش لە عێراق کرد، بە هاوکاری لەگەڵ زیادبونی چالاکییەکانی بەعس لەم ماوەیەی دواییدا، هۆشداریشى دا لە پیلانێک بۆ "تیرۆرکردنی 30 سەرکردەی شیعە"، ئەمەش لە هەوڵێکدا بۆ تێکدانی هاوسەنگی سیاسی و دروستکردنی بۆشایی سەرکردایەتی؛ کە دەکرێت بۆ هەڵگیرساندنی ئاژاوەگێڕی بقۆزرێتەوە.

مەترسییەکە ئاڵۆزە و پاشماوەکانی داعش هێشتا چالاکن

لای خۆیەوە ئەلهیلالی ئاشكرایكرد، هۆشداریی لە کۆکردنەوەی پاشماوەکانی داعش بە هاوکاری لەگەڵ بەعسییەکان شتێکی نوێ نییە، بەڵام لەمکاتەدا دو مانای هەیە، یەكەمیان، لەئێستادا دەوڵەت لە هەندێک بواردا بەدەست بۆشایی ئەمنیەوە دەناڵێنێت، دوەمیشیان؛ چالاکی بەعس هاوتەریبە لەگەڵ گوتارێکی سیاسی گرژ کە دروشمەکانی پێش ساڵی 2003 ڕیسایکڵ دەکاتەوە، بە ئامانجی دروستکردنی درزێکی نیشتمانی یان تائیفی کە عێراق بگەڕێنێتەوە بۆ دۆخی قەیراناوی.

ئایا تیرۆركردنى سەركردە شیعەكان ماناى نەهێشتنى رەمزە دیارەكانە؟

ئەلهیلالى پێیوایە؛ قسەکردن لەسەر هەوڵی تیرۆرکردنى سەرکردە شیعەکان تەنها بە مانای نەهێشتنی رەمزو هێماکان نییە، بەڵکو ئاماژەیە بۆ هەوڵێکی ڕێکخراو بۆ شۆککردنی پێکهاتەی سیاسی، کە دەبێتە هۆی داڕمانی متمانە بە پرۆسەی هەڵبژاردن و تێکدانی وێنەی دەوڵەت، هاوكات، عێراق ئەو تواناو نەفەس درێژییەى نییە کە چاوەڕوانی لەگەڵ ئەو مەترسیانەدا بکات، لەبەرئەوە دەبێت دیدێکی ئەمنی ڕون و چالاکانە لە شوێنی خۆیدا بێت، کە پاراستنی دامەزراوەکان لەگەڵ چاودێریکردنی چالاکییە میدیایی و سیاسییەکان تێکەڵ بکات، چونكە دەتوانرێت هەوڵى ئەو رێكخراوانە وەک ئامرازێکی ئامادەکاریی بۆ هاندان یان ناسەقامگیریی بەکاربهێنرێت.

دواجار؛ ئەو سیاسەتمەدارە سەربەخۆیە عێراقییە هۆشداریشیدا لەوەی نەرمی نواندن لە پرسەکانی هەڵبژاردن یان ئاسایشی کۆمەڵگەدا، دەتوانێت ببێتە هۆی ئەوەی هێزە دوژمنکارەکان دزە بکەنە ناو ناوەڕۆکی پرۆسەی سیاسی و داواشی لە حکومەت کرد ئەم هۆشدارییانە بخاتە سەر کارنامەی ئاسایشی نیشتمانی و بەبێ ڕێککەوتنی سیاسی یان لێکدانەوەی سۆزداریی بە جیددی مامەڵەیان لەگەڵدا بکات.