فەرماندەیەکی هەسەدە: چارەنووسی تێکەڵبوونی هێزەکانمان بە سوپای سووریاوە بەندە بە گۆڕانکاریی دیموکراتییەوە

ئیرادە میدیا

ناوەندی ڕاگەیاندنی هێزەکانی سووریای دیموکرات - هەسەدە، چاوپێکەوتنێکی درێژی لەگەڵ سێبان حەمۆ، ئەندامی فەرماندەیی گشتی هەسەدە و ئەندامی لیژنەی سەربازیی دانوستان لەگەڵ حکومەتی دیمەشق، ئەنجامدا.

لە چاوپێکەوتنەکەدا، سیپان حەمۆ، تیشکی خستە سەر پێشهاتەکانی دانوستان لەگەڵ حکومەتی دیمەشق و پرسی تێکەڵکردنی هێزەکانی سووریای دیموکرات لە سوپای داهاتووی سووریادا.

سێبان حەمۆ، ئەندامی فەرماندەیی گشتی هەسەدە، ئاماژەی بە لایەنە ئەرێنی و لەمپەرەکانی بەردەم ئەم پڕۆسەیە کردووە و ڕوانگەی هەسەدەی بۆ داهاتووی ئەم دۆسیەیە و چوارچێوە نیشتمانی و سەربازییەکانی ڕوون کردووەتەوە.

سەبارەت بە پرسی تێکەڵبوون، سێبان حەمۆ، جەختی لەوە کردووەتەوە: ڕێگەنادەن بە گەڕانەوە بۆ دۆخی پێشوو، هەروەها تێکەڵبوونی هێزەکان بە سوپای سووریاوە بەندە بە گۆڕانکارییەکی ڕاستەقینەی دیموکراتی لە وڵاتدا و جێبەجێکردنی سیستەمێکی دیموکراتی، فیدڕاڵی و ناناوەندی.

فەرماندەکەی هەسەدە، لە چاوپێکەوتنەکەیدا هەڵوێستی هەسەدەی لەبارەی گفتوگۆکانی ئەم دواییە و ئاسۆی داهاتوویان، لە سۆنگەی پێشهاتە سیاسی و سەربازییەکانی گۆڕەپانی سووریادا، خستە ڕوو.

تەواوی چاوپێکەوتنەکەی ناوەندی ڕاگەیاندنی هەسەدە لەگەڵ سیپان حەمۆ، ئەمڕۆ لە ڕێگەی ماڵپەڕی فەرمی هێزەکانی سووریای دیموکراتەوە بڵاودەکرێتەوە.