ئیسرائیل هێرشێكى قورسى ئه‌نجامداو كوژراوو بریندارێكى زۆر هه‌یه‌

بەبیانووی کردنە ئامانجی هێزەکانیان لەشاری ڕەفەح، دوای ڕاوێژپێکردن بەبەرپرسانی باڵای سەربازیی وڵاتەکەی، بنیامین ناتانیاهۆ فەرمانی بەسوپای ئیسرائیل کرد بەتوندی بۆردوومانی کەرتی غەززە بکەن.

دوای دوو هەفتە لەوەستانی شەڕ، بەفەرمانی ڕاستەوخۆی بنیامین ناتانیاهۆ سەرۆک وەزیرانی ئیسرائیل، هێرشی ئیسرائیل بۆ سەر کەرتی غەززە دەستیپێکردەوە، ئەمەش دوای کوژرانی ئەفسەرو سەربازێک‌و برینداربوونی سەربازێکی دیکەی لەڕەفه‌ح لەباشووری کەرتی غەززە.

بەپێی فەرمانەکەی ناتانیاهۆ، سوپای ئیسرائیل هێرشی ئاسمانیکردەسەر کەرتی غەززەو چەند ناوچەیەکی کەرتەکەی بۆردوومانکرد.

بەرپرسێکی ئیسرائیل بەپێگەی ئەکسیۆسی ئەمریکی وتووه‌، "پێش هێرشەکان ئیسرائیل ئیدارەی سەرۆک ترەمپ ئاگادارکردووەتەوە".

فریاگوزاری کەرتی غەززەش دەڵێت، لەئەنجامی هێرشەکە نۆ کەس کوژراون‌و 15 کەسی دیکەش برینداربوون.

هاوکات؛ بزووتنەوەی حەماس ناڕەزایەتی خۆی بەرامبەر هێرشەکان دەربڕیی‌و ڕایگەیاند، بەهیچ شێوەیەک هێرشمان نەکردووەتەسەر سەربازانی ئیسرائیل‌و دووپاتیدەکەینەوە بەئاگربەست پابەندین، داواشیان لەوڵاتانی نێوەندگیرکرد فشاربخەنەسەر ئیسرائیل بۆ ئەوەی پابەندبێت بەئاگربەستەوە.

لەلایەکی دیکەوه‌ یسرائیل کاتز وەزیری بەرگریی ئیسرائیلیش هۆشداریدایە حەماس کە بەهێرشکردنەسەر سەربازەکانمان حەماس "هێڵی سووڕی تێپەڕاندووەو باجی قورس دەدات"و بەهێزێکی زۆرە وەڵامیان دەدەینەوە.

ئیدارەی ترەمپیش دڵنیاییدا ئاگربەست لەنێوان ئیسرائیل‌و حەماس بەردەوامدەبێت‌و جەی دی ڤانس جێگری ترەمپ وتی، "ئەوەی ڕوویداوە تەنها وەڵامدانەوەی ئیسرائیل بووە بۆ هێرشی بزووتنەوەی حەماس بۆ سەر سەربازێکی ئیسرائیلی".