شیعەیەکی سۆسیالیست بە سەرۆکی شارەوانی نیویۆرک دیاریکرا

زوهران مەمدانی لە ڕکابەرییەکانی هەڵبژاردنی سەرۆکی شارەوانیی نیۆیۆرک سەر کەوت و بووە یەکەم موسڵمان کە سەرۆکایەتیی گەورەترین شاری ئەمریکا بکات.

شەوی ڕابردوو لەئەنجامی یەکلابوونەوەی دەنگەکانی هەڵبژاردنی سەرۆکایەتیی شارەوانی لەشاری نیویۆرک، زوهرا مامدانی کە تەمەن 34 ساڵە کە بەڕەگەز هیندییە وەک سەرۆکی شارەوانیی ئەمشارە هەڵبژێردراو بەیەکەمین موسڵمانی شیعە دادەندرێت کە ئەم پۆستەی بەدەستهێنابێت.

سەرکەوتنی مەمدانی بەزیاتر لە 50٪ی دەنگەکان‌و ڕێژەی دەنگدانی پێوانەیی دوو ملیۆن دەنگ، بووە هۆی ئاهەنگگێڕان لەگەڕەکەکانی وەک ئاستۆریا لەکوینز، کە یەکەمجار هەڵمەتەکەی لەوێ دەستیپێکرد.

هەڵمەتەکەی مامدانی لەسەر دابینکردنی نرخی هەرزان‌و دادپەروەریی کۆمەڵایەتی‌و بەڵێنی بەستنی کرێ‌و پاسی بەخۆڕایی‌و چاودێریی منداڵان‌و دووکانەکانی میوەفرۆشیی شارەکان بوو.

بۆ دابینکردنی پارەی ئەم پرۆگرامانەش پێشنیازی بەرزکردنەوەی کەمترین مووچە بۆ 30 دۆلار بۆ هەر کاتژمێرێک تا ساڵی 2030و زیادکردنی باج لەسەر کۆمپانیاکان‌و ملیۆنێرەکانی کردووە.

ئەنجومەنی پەیوەندییەکانی ئەمریکاو ئیسلام (CAIR) سەرکەوتنەکەی مەمدانی بەوەرچەرخانێکی مێژوویی بۆ بەشداریی سیاسیی موسڵمانانی ئەمریکا ناوبرد.

ئەنجومەنەکە دەڵێت:"توانای مەمدانی بۆ سەرکەوتن لەکاتێکدا بووە کە بەئاشکرا داکۆکی لەمافەکانی مرۆڤی فەڵەستینییەکان دەکات‌و ڕووبەڕووی ڕق‌و کینەی دژ بەموسڵمانان دەبێتەوە".