بایده‌میر گه‌یشته‌ ڕۆژئاواو له‌گه‌ڵ مه‌زڵوم عه‌بدى كۆده‌بێته‌وه‌

به‌پێى سه‌رچاوه‌كانى هه‌واڵ، ئێواره‌ى ئه‌مڕۆ، عوسمان بایده‌میر سیاسه‌تمه‌دارى ناسراوى كوردو سه‌رۆكى گه‌وره‌ شاره‌وانى پێشوى ئامه‌د له‌باكورى كوردستان، گه‌یشتوه‌ته‌ ڕۆژئاواى كوردستان.

ئێواره‌ى ئه‌مڕۆ عوسمان بایدەمیر سیاسەتمەداری دیارى باكورى كوردستان، له‌باشوره‌وه‌ خۆى گه‌یانده‌ ڕۆژئاواو بڕیاریشه‌ له‌گه‌ڵ مه‌زڵوم عه‌بدى فه‌رمانده‌ى گشتیى هه‌سه‌ده‌ كۆبونه‌وه‌یه‌كى گرنگ ئه‌نجامبدات.

ئه‌وه‌ش ئاشكراكراوه‌، بڕیاروایه‌ بایدەمیر سەردانی ژمارەیەک پارت‌و ڕێکخراوی مەدەنی‌و دەستەو ناوەندە کوردییەکانی ناوچەکانی ئیدارەی خۆسەر بکات.

سه‌رچاوه‌یه‌كى ئاگادار له‌وباره‌یه‌وه‌ ده‌ڵێت، "عوسمان بایده‌میر سه‌ره‌تا لەگەڵ مەزڵوم عەبدی فەرماندەی گشتیی هێزەکانی سوریاى دیموكرات (هه‌سه‌ده‌) كۆبونه‌وه‌یه‌كى گرنگ ئه‌نجامده‌دات‌و كۆبونه‌وه‌یه‌كى گرنگ ده‌كه‌ن".

سه‌ردانه‌كه‌ى بایده‌میر بۆ ڕۆژئاواى كوردستان دواى سه‌ردانێكى بۆ هه‌رێمى كوردستان دێت كه‌ چه‌ند ڕۆژێك له‌هه‌ولێر مایه‌وه‌و زۆربه‌ى لایه‌نه‌ سیاسییه‌كانیشى به‌سه‌ركرده‌و چه‌ند كۆبونه‌وه‌یه‌كیشى ئه‌نجامدا.

زانیارییه‌كان باس له‌وه‌ده‌كه‌ن، ئه‌گه‌رى ئه‌وه‌ هه‌یه‌ په‌یامێك له‌باشوره‌وه‌ له‌هه‌گبه‌كه‌ى بایده‌میردا هه‌بێت بۆ سه‌ر مێزى كۆبونه‌وه‌ى له‌گه‌ڵ مه‌زڵوم عه‌بدى فه‌رمانده‌ى گشتیى هه‌سه‌ده‌.