کەجەکە: کۆمەڵکوژی دێرسیم یەکێکە لە دڕندەترین تاوانەکانی مێژووە

ئیرادە میدیا

بە بۆنەی ٨٩ـەیەمین ساڵیادی کۆمەڵکوژی دێرسیم، هاوسەرۆکایەتی کۆنسەی بەڕێوەبەری کۆما جڤاکێن کوردستان کەجەکە ڕاگەیاندراوێکی بڵاوکردەوە و تێیدا جەختی کردەوە: ئەم کۆمەڵکوژییە یەکێکە لە دڕندەترین و بێ بەزەینانەترین تاوانەکانی مێژووی مرۆڤایەتی.

کەجەکە ڕایگەیاند: لە ١٥ـی تشرینی دووەمی ١٩٣٧، ڕێبەری بەرخۆدانی دێرسیم سەید ڕەزا و هاوڕێکانی بە پیلانگێڕی لەلایەن دەوڵەتی تورکەوە لە سێدارەدران، لە کاتێکدا سەید ڕەزا هەوڵیدا کێشەکە بە ڕێگەیەکی ئاشتییانە چارەسەر بکات. کەجەکە ئەو کۆمەڵکوژییەی شەرمەزار کرد کە تێیدا خوێنی ژنان و تەنانەت ژنانی دووگیانیش ڕژا و بە بەڵگەیەکی ڕوونی زیهنییەتی نکۆڵیکار و قڕکەری دەوڵەتی تورکیای دانا.

لە بەشێکی دیکەی ڕاگەیاندراوەکەدا، کەجەکە پێداگری لەسەر ئەوە کرد کە چارەسەری پرسی کورد و دیموکراتیزەکردنی تورکیا تەنها بە ڕووبەڕووبوونەوەی ڕاستەقینەی ڕابردوو و بەتایبەت کۆمەڵکوژی دێرسیم بەدی دێت. لەبارەیەوە کەجەکە ئاماژەی بەوەدا: بەرخۆدانی گەلی کورد، کە پەکەکە وەک میراتگرێکی مێژوویی سەید ڕەزا و شێخ سەعیدەکان درێژەی پێدەدات، سەرئەنجام بە سەرکەوتنی پرۆسەی ئاشتی و کۆمەڵگەی دیموکراتیک کە عەبدوڵڵا ئۆجەلان، ڕێبەری زیندانیکراوی کورد پەرەی پێداوە، کۆتایی بە ئازارەکان دەهێنێت.