موچه‌ى فه‌رمانبه‌رانى هه‌رێم له‌ساڵى داهاتوودا چى به‌سه‌ردێت؟

لەکۆبوونەوەی ئەنجوومەنی وەزیرانی عێراق گفتوگۆ لەبارەی بڕگەیەکی پەیوەست بەهەرێمی کوردستان کراوە، جەختکراوەتەوە، دەبێت هەولێرو بەغدا پابەندبن بەڕێککەوتنی پێشوو بۆ بەردەوامبوونی ناردنی مووچە لەساڵی داهاتوودا.

ئەمڕۆ ئەنجوومەنی وەزیرانی عێراق بەسەرپەرشتی محەممەد شیاع سوودانی کۆبووەوە، بڕگەیەکی تایبەتبوو بەکوردستان، میزان موراجەعە - تەرازووی پێداچوونەوە، ڕاپۆرتی خەرجی‌و داهاتەکانی حکومەتی کوردستان.

بەپێی زانیارییەکان، بەکورتی گفتوگۆی لەسەر کراوە، سوودانی خۆی دەستی بە قسەکردن کردووە، پرسیاری کردووە ئایا ڕێککەوتنی نێوان هەولێر و بەغدا چۆن بەڕێوە دەچێت.

تەیف سامی وەزیری دارایی عێراق وەڵامی داوەتەوە، وتوویەتی شاندی دیوانی چاودێریی دارایی عێراق سەردانی هەرێمی کوردستانیان کردووە، هەموو شتێک بە ڕێکوپێکی بەڕێوەدەچێت و هیچ گرفتێک نییە.

سوودانیش وتوویەتی، ئەو رێککەوتنەی پێشتر کراوە لەنێوان هەولێر و بەغدا (کە 31-12-2025 تەواو دەبێت) پێویستە وەک خۆی جێبەجێ بکرێت تا بودجەی 2026 پەسەند دەکرێت.

ڕێککەوتنی هەولێرو بەغدا چەند بڕگەیەکە، هەناردەکردنی نەوت‌و فرۆشتنی لەڕێگەی کۆمپانیای سۆمۆی عێراق، ناردنی 120 ملیار دیناری داهاتی نانەوتی، ناردنی لیستی مووچەو ڕاپۆرتی میزان موراجەعە لەلایەن حکومەتی کوردستان، لەبەرامبەردا بەغدا کۆتایی هەموو مانگێک مووچە بنێرێت.

ئەگەر هەولێرو بەغدا هەردوولایەن بەڕێککەوتنەکە پابەندبن، ساڵی داهاتوو کێشە بۆ ناردنی مووچەی خەڵکی کوردستان دروستنابێت تا بودجەی ساڵی 2026 ئامادەو پەسەند دەکرێت، ئەوکاتیش بودجە بۆ هەرێمی کوردستان دەنێردرێت نەک تەنها مووچە.