ئیلهام ئەحمەد: حکومەتی کاتی سوریا جەنگی دژی گەڕەکە کوردنشینەکان راگەیاندووە

ناوەندی هەواڵ

 ئیلهام ئەحمەد، هاوسەرۆکی پەیوەندییەکانی دەرەوەی ئیدارەی خۆسەر  رایدەگەیەنێت، وەزارەتی بەرگریی حکومەتی کاتی سوریا جەنگی دژی هەردوو گەڕەکی شێخ مەقسود و ئەشرەفییە راگەیاندووە و دەیەوێت "جینۆساید" بەرامبەر کورد ئەنجام بدات.

لە پەیامێکدا لە تۆڕی کۆمەڵایەتیی ئێکس، ئیلهام ئەحمەد، هاوسەرۆکی پەیوەندییەکانی دەرەوەی ئیدارەی خۆسەری باکوور و رۆژهەڵاتی سوریا ئاماژەی بەوەکردووە، ئەو دوو گەڕەکە پڕن لە دانیشتووان و زۆرینەیان خەڵکی عەفرینن کە بەزۆر کۆچیان پێکراوە و ماوەیەکیش لەلایەن هێزەکانی سەر بەو وەزارەتەوە گەمارۆی توندیان خرابووە سەر.

 ئیلهام ئەحمەد، باسی لەوەشکردووە، سەرەڕای ئەوەی کورد پابەندبووە بە رێککەوتنی 1ی نیسانەوە و هەوڵی زۆریان داوە بۆ گفتوگۆ، بەڵام لایەنەکەی دیکە پابەند نەبووە و وەزارەتی بەرگریی حکومەتی کاتیی سوریا هەموو دەرگایەکی گفتوگۆی داخستووە.

هاوسەرۆکی پەیوەندییەکانی دەرەوەی ئیدارەی خۆسەر، داوا لە بەرپرسانی حکومەتی کاتی دەکات بەرپرسیارێتی هەڵبگرن و رێگەی ژیری و گفتوگۆ هەڵبژێرن نەک شەڕ، چونکە "سورییەکان بەدەست جەنگەوە زۆر ناڵاندوویانە". هاوکات داوا لە گەنجانی سوریا دەکات جەنگ رەتبکەنەوە و دەنگی هەق بەرز بکەنەوە.