کورتهێنانی دارایی" یان "کورتهێنانی شەفافییەت و بەرپرسیارێتی"؟

دوای 48 ڕۆژ لە بێمووچەیی.. هەرێم چەقۆ بۆ سەر پشتی کارمەندانی گڕێبەست و وانەبێژانی دانەمەزراو و خانەنشینان ئامادە دەکات !

چاوەڕوانییەکی بێپایان و سیناریۆیەکی تاقەتپڕوکێن؛ لە کاتێکدا هاووڵاتیان و مووچەخۆران لە خراپترین دۆخی گوزەراندان، هێشتا لۆژیکی "ملشکاندن" و حیساباتی سیاسی لە نێوان بەغدا و هەرێمدا باڵادەستە.

دوای 48 ڕۆژ لە کۆکردنەوەی داهاتی ناوخۆ و نانەوتی، حکومەتی هەرێم بە زمانێکی شەرمنانەوە بە بەغدا دەڵێت: "تەنها 60 ملیارمان هەیە!"، بەغداش زۆر بێباکانە و بە زمانێکی توند وەڵام دەداتەوە و دەڵێت "ناخوات! یان 120 ملیارەکەمان بۆ دەنێرن، یان خۆمان لە مووچەی فەرمانبەران دەبڕین و ناردنی مووچە دوای دەخەین!"

ژمارەکان چیمان پێدەڵێن؟ (کارەساتەکە لە کوێدایە !)
 بە پێی ئەو زانیاری و داتایانەی حکومەتی هەرێم بڵاویان دەکاتەوە، هەرێم مانگانە پێویستی بە 948 ملیار دینار هەیە بۆ مووچەی فەرمانبەران و هێزە ئەمنییەکان. بەڵام بەهۆی ململانێ و جیاوازی حیسابکردنی داهاتی نانەوتی، کورتهێنان لە ئێستادا گەیشتووەتە سەروی  103 ملیار دینار.، کەئەگەر 43 ملیار دیناری مووچەی 65 هەزار کارمەندی گرێبەست و وانەبێژیشی بخرێتەسەر، ئەوا کورتهێنانی کۆتایی دەگاتە 168 ملیار دینار! ئەمە بڵاوکراوەی میدیاکانی نزیک لە دەسەڵات خۆیان وادەڵێت ، لێرەدا ئەگەر وابێت کەواتە هەرێم و دەسەڵاتە خۆماڵیەکە چەقۆی ئەو کورتهێنانە لە کێدا تاقی دەکاتەوە ؟ 

بە پێی ئەو هەواڵ و شیکارییە ئابوریانەی کە بەردەوام بڵاو دەکرێنەوە لە لایەن کەسانی نزیک لە دەسەڵات و میدیاکانیان ، هاوکێشە غەدر لێکراوەکە لە ڕووخاندنی دیوارە نزمەکاندا کورت دەبێتەوە؛ واتا لەئەگەری بەردەوامی ئەو شەڕە پێستەی لە نێوان هەولێر و بەغداد لە لایەک و هەولێر و سلێمانی لەلاکەی دیکەوە ئەنجام دەدرێت، یەکەمین چین و توێژ کە دەبنە قوربانی و لە مووچەی مانگی شەش بێبەش دەکرێن، بریتین لە:
  وانەبێژان . کارمەندانی گرێبەست و خانەنشینان .
حکومەتی هەرێم زیاتر لە 48 ڕۆژە داهات  لە باج، ڕسوومات، و توندکردنەوەی گیرفانی هاووڵاتیان، مەرز و نەوت و غاز و فڕۆکەخانە و هاوکاری وڵاتان، کۆدەکاتەوە و دەڵێت تەنها 60 ملیار دیناریان هەیە ؟! ئەمە "کورتهێنانی داراییە" یان "کورتهێنانی شەفافییەت و بەرپرسیارێتی"؟