پەلامارە مووشەکییەکان و کشانەوەی ئەمریکا؛ مەسرور بارزانی هۆشداریی لەبارەی مەرگی قەوارەکە دەدات!

شۆک لە فاینانشەڵ تایمزەوە: هەرێمی کوردستان بێ هیچ بەرگرییەک لەبەردەم ئاگر و مەرگدا بەتەنیا جێهێڵراوە!

لە کاردانەوەیەکی خێرا، توند و چاوەڕواننەکراودا بەرانبەر بەو دۆخە ئەمنییە پڕ لە هەڕەشە و ئاڵۆزەی کە ناوچەکەی گرتووەتەوە، نووسینگەی ڕاگەیاندنی سەرۆکی حکومەتی هەرێمی کوردستان ڕونکردنەوەیەکی فەرمی، وردی لەسەر ناوەڕۆکی راپۆرتێکی ڕۆژنامەی ناسراوی بەریتانی (فاینانشەڵ تایمز) بڵاوکردەوە.

ئەم هەنگاوە دوای ئەوە هات کە ڕاپۆرتەکە چەندین لێدوان و وتەی هەستیاری مەسرور بارزانی، سەرۆکی حکومەتی هەرێمی کوردستانی لەخۆ گرت و تێیدا دۆخی داهاتووی هەرێمی لە بەردەم گێژاوە هەڕەشەکاندا بە زۆر مەترسیدار و کارەساتبار وەسف کرد.

نووسینگەی سەرۆکی حکومەت لە ڕونکردنەوەکەیدا جەختی لەوە کردەوە، نووسەری ڕاپۆرتەکەی فاینانشەڵ تایمز بەشێک لە لێدوانەکانی سەرۆکی حکومەتی بە هەڵە گواستووەتەوە و زیاتر بۆچوون، تێڕوانین و لێکدانەوەی کەسیی خۆی خستووەتەڕوو، نەک دەقی ڕاستەقینە و ووشە بە ووشەی قسەکانی مەسرور بارزانی. لە بەرانبەردا، نووسینگەکە دەقی ڕاستەقینەی وتەکانی سەرۆکی حکومەتی بڵاوکردەوە کە تێیدا کۆمەڵێک خاڵی چارەنووسساز، هەستیار و ستراتیژی لەخۆ دەگرێت کە پەیوەندییان بە ئایندەی قەوارەی هەرێمەوە هەیە.

لە دیارترین ئەو خاڵانەی کە سەرۆکی حکومەتی هەرێمی کوردستان جەختی لەسەر کردووەتەوە، پرسی پاراستنی ئاسمانی و نەبوونی سیستەمی بەرگریی سەربەخۆی هەرێمە. بەپێی زانیارییە راگەیەندراوەکان، هەرێمی کوردستان زیاتر لە هەزار جار ڕووبەڕووی هێرشی توند و دڕندانەی مووشەکی و درۆنی بووەتەوە، و جێهێشتنی بێ دابینکردنی هیچ سیستەمێکی بەرگریی ئاسمانیی گونجاو، مایەی نیگەرانییەکی قووڵ و بێپەناکردنی تەواوی هاوپەیمانەکانە لە بەرانبەر دەستدرێژییەکاندا. سەرۆکی حکومەت ئاماژەی بەوەش کردووە کە لەبەرئەوەی کڕینی چەک دەبێت لە ڕێگەی حکومەتی فیدراڵییەوە بێت، ڕێگریکردنیان لەو بوارەدا مانایەکی تری دەبێت، ئەویش ئەوەیە کە بە ئەنقەست دەکرێنە ئامانج و لاواز دەکرێن.

هاوکات، مەسرور بارزانی هۆشدارییەکی توند و بێپەردەی دا لە کشانەوەی چاوەڕوانکراوی هێزەکانی ئەمریکا و هاوپەیمانان لە عێراق لەم کاتە هەستیار و پڕ لە پشێوییەدا، بەجۆرێک کە بۆشاییەکی ئەمنیی گەورە دروست دەکات و دۆخەکە بەرەو ناسەقامگیرییەکی کوشندە دەبات، هاوشێوەی ئەو هەڵە مێژووییەی کە ئەمریکا لە ساڵی ٢٠١١ ئەنجامی دا و بووە هۆی سەرهەڵدانی ڕێکخراوی تیرۆریستی داعش.