بەسێ هۆزات: تا دەستووری تورکیا نەگۆڕدرێت ئاشتی نایەتەدی؛ لە باشووریش پێویستە دەسەڵاتی بنەماڵەیی کۆتایی پێبێت

بەسێ هۆزات لە چاوپێکەوتنێکدا جەخت دەکاتەوە، تاوەکو دەستووری تورکیا نەگۆڕدرێت و مافەکانی کورد نەپارێزدرێت، ئاشتییەکی هەمیشەیی نایەتە کایەوە؛ هەروەها داوا دەکات لە باشووری کوردستان کۆتایی بە دەسەڵاتی بنەماڵەیی بهێنرێت و حکومەتێکی یەکێتیی دیموکراتیک پێکبهێنرێت، هۆشداریش دەدات کە سیاسەتە سەرکوتکارەکانی دیمەشق لە ڕۆژئاوا بەرەو شکست دەچن.

لە چاوپێکەوتنێکی فراواندا لە کەناڵی مەدیا خەبەر تیڤیدا، بەسێ هۆزات، هاوسەرۆکی کۆنسەی بەڕێوەبەریی کۆما جڤاکێن کوردستان (کەجەکە)، هەڵسەنگاندنی وردی بۆ قۆناغەکانی ئێستای پرۆسەی ئاشتی، پێگەی عەبدوڵا ئۆجەلان، و دۆخی سیاسی و ئەمنی لە سەرجەم پارچەکانی کوردستان و ناوچەکە کرد. ناوبراو جەختی لەوە کردەوە که‌ چارەسەریی ڕیشەیی دۆزی کورد و سەقامگیریی ناوچەکە بەستراوەەتەوە بە گۆڕانکاریی دیموکراتیک و بنەڕەتی لە سیستەمەکانی حوکمڕانی لە تورکیا، عێراق، سووریا و ئێراندا.

دیموکراسی و دەستووری نوێ؛ مەرجی سەرەکیی ئاشتی لە تورکیا

سەبارەت بە هەنگاوەکانی پرۆسەی ئاشتی و دەرچوونی یاسای چوارچێوە لە تورکیا، بەسێ هۆزات ڕەخنەی توندی لە یاساکە گرت و بە دەقێکی پڕ لە کەموکوڕی و پارادۆکس وەسفی کرد کە ناتوانێت ببێتە وەڵامدەری پێویستییە بنەڕەتییەکانی پرۆسەکە. هۆزات ئاماژەی بەوە دا که‌ دەستووری هەنووکەیی تورکیا زۆر تاکپارێز، ناوەندیپارێز و فاشیستە، و تاوەکو دەستوورێکی هاوچەرخ، دیموکراتیک و فرەڕەنگ کە دان بە ناسنامە و مافەکانی کورددا بنێت نەدابنرێت، مرۆڤ ناتوانێت باس لە ئاشتییەکی هەمیشەیی بکات. ناوبراو جەختی لەوەش کردەوە کە بۆ سەرخستنی پرۆسەکە، پێویستە مەرجەکانی ئازادیی ژیان و کارکردنی ڕێبەر ئاپۆ بە شێوازێکی فەرمی و یاسایی مسۆگەر بکرێن، بە جۆرێک بتوانێت بە ڕۆڵی خۆی وەکو ڕێکخەر و هەماهەنگیکاری سەرەکیی پرۆسەکە هەستێت.

باشووری کوردستان؛ پێویستیی کۆتاییهێنان بە دەسەڵاتی بنەماڵەیی و پێکهێنانی حکومەتی یەکێتیی دیموکراتیک

هۆزات لە بەشێکی تری قسەکانیدا تیشکی خستە سەر دۆخی باشووری کوردستان و هەنگاوی یەکخستنی هێزەکانی پێشمەرگە لە ژێر چەتری وەزارەتێکی هاوبەشدا وەک پێشکەوتنێکی ئەرێنی لێکدایەوە. لە بەرامبەر پرسی پێکهێنانی کابینەی نوێی حکومەتدا، جەختی کردەوە که‌ کاتی ئەوە هاتووە کۆتایی بە دەسەڵاتدارێتیی حزبی و بنەماڵەیی بهێنرێت و حکومەتێکی "یەکێتیی دیموکراتیک" پێکبهێنرێت کە نوێنەرایەتیی دادپەروەرانەی هەموو پێکهاتە و هێزە سیاسییەکان بکات. ناوبراو داوای کرد سیستەمی فیدراڵی ئێستا بگۆڕدرێت بۆ فیدراڵییەکی دیموکراتی ڕاستەقینە، و ئاماژەی بەوە دا که‌ هەرێمێکی سەقامگیر و دیموکرات لە باشوور دەبێتە پاڵپشتێکی گەورە بۆ تێکۆشانی گشتیی کوردان لە تورکیا و سووریا و ئێران.

ڕەخنە لە سیاسەتەکانی دیمەشق و قەیرانەکانی ڕۆژئاوا

سەبارەت بە دۆخی ڕۆژئاوا و پرۆسەی ئینتێگراسیۆن لەگەڵ دیمەشق، بەسێ هۆزات ڕایگەیاند که‌ لە سایەی سیستەمێکی فاشیستی و نەتەوەپەرستدا لە دیمەشق، ئەنجامدانی ئینتێگراسیۆنێکی دیموکراتیک مەحاڵە. ناوبراو ڕەخنەی لە سنووردارکردنی زمانی کوردی و بڕیارەکانی پەیوەست بە خوێندن گرت و جەختی کردەوە که‌ قەدەغەکردن یان بەرتەسککردنەوەی خوێندن بە زمانی دایک لە پڕۆگرامەکاندا، مانای ناتێگەیشتنە لە مافە سەرەتاییەکانی گەلی کورد و دەرگاکردنەوەیە بە ڕووی نائارامیدا، چونکە گەلی ڕۆژئاوا بە قوربانیدانی گەورە سیستەمی خۆبەڕێوەبەریی پاراستووە و هەرگیز دەستبەرداری زمانی دایک و مافەکانی نابێت.

دۆخی ئێران و خەباتی شۆڕشی "ژن، ژیان، ئازادی"

لە کۆتایی لێدوانەکانیدا، هۆزات تیشکی خستە سەر دۆخی ئێران و ڕۆژهەڵاتی کوردستان و ڕایگەیاند که‌ ڕژیمی ئێران بەهۆی سەرکوتکاری، لەسێدارەدان و پشتگوێخستنی داخوازییەکانی کۆمەڵگە، ڕەوایەتیی خۆی لەدەست داوە. شۆڕشی "ژن، ژیان، ئازادی" وەک توندترین تەقینەوەی ناڕەزایەتیی کۆمەڵایەتی نیشان دا کە پێشەنگایەتییەکەی لەلایەن ژنانەوە بەڕێوەچوو. ناوبراو دووپاتی کردەوە که‌ تەنها ڕێگە لە بەردەم دەسەڵاتی ئێراندا ئەنجامدانی ڕیفۆرمی دیموکراتیک و قبووڵکردنی مافەکانی گەلان و دیموکراسیی خۆجێییە، کە لەم پێناوەشدا تێکۆشانی پەژاک و هێزە دیموکراتیکەکان بۆ بنیادنانی ئێرانێکی دیموکراتی فیدراڵ، تاکە ڕێگەی ڕاستە بۆ چارەسەریی قەیرانەکان.