بافڵ جەلال تاڵەبانی: دەتوانین بە 24 کاتژمێر حکومەت پێکهێنین و دەرفەتێکی زێرین لەبەردەم کورددایە

لە چوارچێوەی بەڕێوەچونی کۆڕبەندی ساڵانەی مێری لە شاری هەولێر، بافڵ جەلال تاڵەبانی، سەرۆکی یەکێتیی نیشتمانیی کوردستان، لە پانێڵێکی تایبەتدا وتارێکی پێشکەش کرد و تیشکی خستە سەر دوایین پەرەسەندنە سیاسی و ئەمنییەکانی هەرێمی کوردستان، عێراق و ناوچەکە، جەختیشی کردەوە ناوچەکە لەبەردەم مەترسییەکی گەورەدایە بەڵام دەرفەتیشە.

هەڕەشە ناوچەییەکان و هەوڵەکانی پاراستنی قەوارەی هەرێم

سەرۆکی یەکێتی ئاماژەی بەوە کرد، ناوچەکە بە گشتی لەبەردەم هەڕەشە و مەترسیی گەورەدایە و دۆخی بەغداش کاریگەری ڕاستەوخۆی لەسەر خراپبوونی دۆخی کوردستان دەبێت. بۆیە داوای کرد لایەنە کوردییەکان ناکۆکییەکانیان وەلابنێن و هەنگاوی کرداری بنێن بۆ پاراستنی قەوارەی هەرێم. هاوکات لەبارەی پەیوەندییەکانی نێوان تاران و واشنتۆن، ئەوەی خستەڕوو کە یەکێتی وەک لایەنێکی متمانەپێکراو توانیویەتی لە چەند شوێنێکی گرنگدا هاوکاری باشبوونی پەیوەندییەکانی نێوان ئێران و ئەمریکا بێت و ڕۆڵی تارانیشی بە گرنگ وەسف کرد بۆ خستنەوەی گرووپەکان بۆ ناو چارەسەری سیاسی.

پێکهێنانی حکومەت و ڕەخنە لە پەیوەندییەکان لەگەڵ پارتی

لەبارەی پرسی پێکهێنانی حکومەتی داهاتووی هەرێم، بافڵ تاڵەبانی ڕایگەیاندئەوان ئامادەن بۆ هەموو جۆرە ڕێککەوتنێک و جەختی کردەوە: "دەتوانین بە 24 کاتژمێر حکومەت پێکهێنین، کێشەکان ئەوەندە گەورە نین و بە شتی بچووک و ئاسان چارەسەر دەبن." لە هەمان کاتدا ڕەخنەی لە پرۆسەی دانوستانەکانی رابردوو گرت و ئاماژەی بەوە دا سەرەڕای سەردانە بەردەوامەکان، هێشتا نەگەیشتوونەتە ئەنجامی کۆتایی. لەگەڵ ئەوەشدا، پێشوازی لە ڕێککەوتنی لایەنەکانی تر کرد و وتی ڕێککەوتنی یەکێتی و نەوەی نوێ دەرفەتێکی جددییە.

پرۆسەی ئاشتی لە تورکیا و دەستپێکردنی لە ڕۆژهەڵات

سەرۆکی یەکێتی پشتیوانیی تەواوی خۆی بۆ پرۆسەی ئاشتی لە تورکیا دەربڕی و ڕوونیشیکردەوە کە وەک درێژەپێدانێکی ئەمە، پرۆسەیەکی هاوشێوەی ئاشتی لە نێوان لایەنەکاندا لە ئێران و ڕۆژهەڵاتی کوردستانیش دەستی پێکردووە کە هەرچەندە پرۆسەیەکی دوورودرێژە، بەڵام پێشبینی سەرکەوتنی دەکات.

پەیوەندیی لەگەڵ بەغدا و گۆڕانکارییە سیاسییەکان

تاڵەبانی دۆخی سیاسی و حکومەتی ئێستای بەغدای بە دەرفەتێکی زێڕین وەسف کرد، چونکە سەرۆک وەزیران تێڕوانینێکی نەتەوەپەرستی و ڕەگەزپەرستی بەرامبەر کورد نییە. هەروەها جەختی کردەوە پێویستە زمانی سیاسی بگۆڕدرێت، چونکە عێراقی بەهێز و ئارام واتای کوردستانێکی ئارام و دەوڵەمەند دەگەیەنێت.

رۆژی 12-10-2026 دیداری مێری لەژێر ناونیشانی "لەو دەڤەرەی تێیدا هاوبەشین؛ پێشخستنی سەقامگیری و هاوكاری و خۆشگوزەرانی"، لە هەولێر دەستی بە كارەكانی كرد و بۆ ماوەی دوو رۆژ بەردەوام دەبێت، تێیدا تیشك دەخرێتە سەر چەندین پرسی هەستیار و گرنگی ناوخۆیی و ناوچەیی.