تەقینەوەی تووڕەیی لە باکووری کوردستان؛ ئازادکردنی تۆمەتبارانی دەستدرێژیکردنە سەر کچێکی ١٣ ساڵان کاردانەوەی لێکەوتەوە

لە ناوچەی گەڤەر (یۆکسەکۆڤا) سەر بە پارێزگای جۆلەمێرگ لە باکووری کوردستان، ئاشکرابوونی ڕووداوێکی دەستدرێژیی سێکسی و هەڕەشەکردن لە کچێکی قوتابیی تەمەن ١٣ ساڵان، شەپۆلێکی توندی ناڕەزایەتی لە میدیاکان و تۆڕە کۆمەڵایەتییەکاندا دروستکردووە.

وردەکاریی ڕووداوەکە و کاردانەوەکان

بەپێی بەدواداچوونەکان و ڕاگەیەندراوی فەرمیی پەرلەمانتارانی دەم پارتی لە ناوچەکە، کچە تەمەن ١٣ ساڵانەکە ڕووبەڕووی دەستدرێژی و هەڕەشە بووەتەوە لەلایەن پاسەوانێکی گوند (جەردەوان) و شۆفێری پاسی قوتابخانەکەی. دوای ئاشکرابوونی تاوانەکە و وەرگرتنی وتەی کچەکە، هەرچەندە هەردوو تۆمەتبارەکە دەستگیرکران، بەڵام دادگا بڕیاری ئازادکردنی بە مەرجی بۆ دەرکردن. ئەم بڕیارە ناڕەزایەتی بەربڵاوی ڕێکخراوەکانی مافی ژنان و منداڵانی لێکەوتەوە. لە ئێستادا کچەکە لەلایەن لایەنە پەیوەندیدارەکانی حکومەتەوە خراوەتە ژێر چاودێری و پاراستنی فەرمی، بەمەبەستی دابینکردنی ئاسایش و پاڵپشتی دەروونی بۆی.

لە لایەکی ترەوە، ئۆزنور بارتن، پەرلەمانتاری دەم پارتی لە بازنەی جۆلەمێرگ، بابەتەکەی گەیاندووەتە پەرلەمانی تورکیا و داوای لێکۆڵینەوەی جدی و سزادانی توندی تاوانبارانی کردووە بەبێ هیچ چاوپۆشییەک.

هەڵکشانی ئامارەکانی ژنکوژی و سیاسەتی سزانەدان

ئەم تاوانەی گەڤەر لە کاتێکدایە کە لە شارەکانی باکووری کوردستان و تورکیا کوشتن و گیانلەدەستدانی گوماناویی ژنان ڕوو لە زیادبوونە. بەپێی ئامارەکانی پلاتفۆرمی "کوشتنی ژنان ڕادەگرین"، لە شەش مانگی یەکەمی ساڵی ٢٠٢٦دا لە تورکیا ١٥٠ ژن کوژراون و ١٥١ ژنی دیکەش بە شێوازی گوماناوی گیانیان لەدەستداوە. هەروەها لە مانگی ئەیلوولدا ٢٨ ژن کوژراون و ١٩ ژنی دیکەش بە گوماناوی مردوون.

لە وەڵامی ئەم بارودۆخەدا، تۆڕی بەرەنگاربوونەوەی توندوتیژی لە ئامەد، چوار هەفتەیە چالاكیی "ئێشگریی یادکردنەوە و دادپەروەری" بەردەوام دەکات. لەم چالاکییانەدا، وێنەی ژنە کوژراوەکان بەرز دەکرێتەوە و چیرۆکی ژیانیان دەخوێندرێتەوە. ژنانی بەشداربوو جەخت دەکەنەوە کە ژنانی کوژراو تەنیا ژمارە و وێنەیەک نین، بەڵکو دەسەڵاتی دادوەری و سیاسەتەکانی سزانەدانی تاوانباران هۆکاری سەرەکین لە هەڵکشانی ڕێژەی تاوانەکان لە کۆمەڵگەدا.