چوار پرس تەوەری سەرەکی گفتۆگۆی نێوان پزیشکیان و تاڵەبانییە

ناوەندی هەواڵ

سەرۆک کۆماری ئێران دوای سەردانی هەولێر، نیوەڕۆی ئەمڕۆ پێنجشەممە12ی ئەیلولی2024، لەڕێگەی فڕۆکەخانەی نێودەوڵەتی سلێمانیەوە گه‌یشته‌ سلێمانى ‌ و له‌لایه‌ن سەرۆکى یەکێتى و وه‌فدێكى باڵاى حکومی و حزبییەوە‌ پێشوازیی لێكرا.

بەگوێرەى کارنامەى سەردانەکەى پزیشکیان، دواى کۆبوونەوەى لەگەڵ بەرپرسانى باڵاى هەرێمی کوردستان و حکومەت، دوانیوەڕۆى ئەمڕۆ  لە سلێمانى سەردانی مەزارى جەلال تاڵەبانى، سەرۆک کۆمارى پێشووترى عێراقی کرد و دواتر لەگەڵ بەرپرسانی یەکێتی کۆدەبێتەوە، بەپێی زانیارییەکان پزیشکیان چوار تەوەر لەگەڵ بافڵ تاڵەبانی تاوتوێ دەکات و  دۆسییەی هێزەکانی کۆمەڵە و دیموکرات لەگەل بەرپرسانی هەرێم یەکلایی دەکاتەوە.

بەپێی زانیاریەەکان  و بەگوێرەى کارنامەی سەردانەکە، پزیشکیان، لەگەڵ بەرپرسانى باڵاى حکومى لە سلێمانى  کۆدەبێتەوە و دواتر لەگەڵ بافڵ  تاڵەبانی و سەرکردە باڵاکانی ئەو حزبە گفتوگۆ دەکات سەبارەت بە چوار تەوەر ئەوانیش "سیاسی، ئابووری، ئەمنی، تەندروستی، و چەند تەوەرێکی دیکە کە لە بەرژەوەندی ئێران و یەکێتی نیشتمانی کوردستانن.

پزیشکیان لەسەردانەکەیدا بۆ هەولێرو سلێمانی، دوای یەکلایی کردنەوەی پرسی حزبە کوردیەکانی ڕۆژهەڵات، پرسی کشانەوەی ئەمریکا لە هەرێم دەکاتە تەوەری سەرەکی و هەوڵەدات ئەمریکا لەهەرێم بێ جێگاو ڕێگا بکات .

شارەزایان پێیان وایە، سەردانەکەی سەرۆک کۆماری ئێران بۆ تەواوکردنی ئەو سەردانەیە کە لەلایەن ئیبراهیم ڕەئیسی سەرۆکی کۆچکردووی ئێران پێش ڕووداوی کەوتنەخوارەوەی فڕۆکەکەی پلانی بۆ دانابوو. 

مەسعود پزیشکیان دوێنی چوارشەممە بەسەردانێکی فەرمی گەیشتە عیراق و لەلایە محمد شیاع سودانی سەرۆک وەزیران پێشوازی لێکرا، ئەمڕۆش پێنجشەممە12ی ئەیلول2024 بە سەردانێکی فەرمی بەسەرۆکایەتی شاندێکی باڵا گەیشتە هەولێرو دواتر سەردانی سلێمانی کرد.