وەزارەتی دارایی لەبارەى دابەشکردنی فۆڕمی زەوی راگه‌یه‌ندراوێكی بڵاوكرده‌وه‌

ناوەندی هەواڵ

وەزارەتی دارایی و ئابوری حكومه‌تی هه‌رێم ئەو دەنگۆیانەى ڕەتکردەوە کە گوایە وەزارەتەکە ڕێگرە لە پێدانی فۆڕمی زەوی بە فەرمانبەر و موچەخۆران و دەڵێت، ئەو کەس و لایەنانەی تۆمەتبارمان ده‌كه‌ن هیچ زانیارییەكیان لە بارەی ڕێكار و شێوازی دابەشكردنی فۆڕمی زەوی بەسەر فەرمانبەراندا نییە و ڕاستگۆ نەبون.

وەزارەتی دارایی و ئابوری حكومه‌تی هه‌رێمی كوردستان له‌ راگه‌یه‌ندراوێكدا سەبارەت بە دابەشکردنی فۆڕمی زەوی بۆ فەرمانبەران و موچەخۆرانی تایبەت بە ڕێکخراوەکان بڵاویکردەوە، ئەو دەنگۆیانە ڕەتدەکەینەوە کە دەڵێن وەزارەتی دارایی و ئابوری ڕێگرە لە پێدانی فۆڕمی زەوی بەو فەرمانبەر و موچەخۆرانە و وەک وەزارەت هیچ پەیوەندییەکى بە پێدانی فۆڕم و دابەشکردنی زەوی بەسەر فەرمانبەران و موچەخۆراندا نییە و دور و نزیک ئێمە بەشێک نین لەو بابەتە.   

لە راگەیەندراوەکەى وەزارەتی دارایی و ئابوریدا هاتووە، هەموو ئەو ڕێنمایی و ڕێکار و خاڵبەندییانەی بۆ پێدانی زەوی بۆ فەرمانبەران و خانەنشینان و تەواوی چین و توێژەکان دیاریکراوە لە تایبەتمەندی و دەسەڵاتی وەزارەتی شارەوانی و گەشت و گوزاری هەرێمی کوردستانە.     

ئاماژەبەوەدراوەن ئەو کەس و لایەنانەی وەزارەتی داراییان بە ڕێگری لە پێدانی فۆڕمی دابەشکردنی زەوی بەسەر فەرمانبەران و موچەخۆرانی ڕێکخراوەکان تۆمەتبار کردوە هیچ زانیارییەكیان لە بارەی ڕێكار و شێوازی دابەشكردنی فۆڕمی زەوی بەسەر فەرمانبەراندا نییە و ڕاستگۆ نەبون