عیماد جەمیل: هەفتەی داهاتوو بانگەشەی هەڵبژاردن دەستپێدەکات

ناوەندی هەواڵ

سەرۆکی تیمی میدیایی کۆمیسیۆنی باڵای سەربەخۆی هەڵبژاردنەکانی عێراق رایگەیاند، دواکەوتنی بانگەشەى هەڵبژاردن پەیوەندیی بە وردبینیی لیستی کاندیدەکانەوە هەیە، کۆتایی ئەم هەفتەیە تەواو دەبێت و هەفتەى داهاتوو بانگەشە دەستپێدەکات.

عیماد جەمیل، سەرۆکی تیمی میدیایی کۆمیسیۆنی باڵای سەربەخۆی هەڵبژاردنەکانی عێراق رایگەیاند، هیچ کێشەیەک لەبەردەم هەڵبژاردنی پەرلەمانی کوردستاندا نییە، کارەکانی کۆمیسیۆن بۆ هەڵبژاردن لە وادەی خۆیدا بەردەوامە.

وتیشى، دواکەوتنی بانگەشەی هەڵبژاردن پەیوەندیی بە وردبینیکردن لە لیستی ناوی کاندیدەکانەوە هەیە، چونکە لیستەکە زۆرە، پێشبینی دەکەین تا کۆتایی ئەم هەفتەیە وردبینیی تەواو ببێت، بە تەواوبونیشى هەفتەی داهاتوو بانگەشە دەستپێدەکات.

بڕیارە رۆژی 20ی ئۆکتۆبەری ئەمساڵ هەڵبژاردنى خولى شەشەمى پەرلەمانى کوردستان ئەنجام بدرێت، بە پێى ئامارەکانیش دوو ملیۆن و 899 هەزار و 578 کەس مافی دەنگدانیان هەیە لەکۆى ئەو ژمارەیەش دوو ملیۆن و 683 هەزار و 618ـیان دەنگدەری گشتی و 215 هەزار و 960ـیان دەنگدەری تایبەتن.