بۆ یەکەمجار لە مێژووی ئێران کوردێکی سوننە مەزهەب کرا بە پارێزگاری سنە

بۆ یەکەمجار دوای 44 ساڵ بۆ یەكەمجار لە مێژووی ئێراندا،كوردێكی سوننە مەزهەب دەبێتە پارێزگاری سنەی رۆژهەڵاتی كوردستان.

فاتمە موهاجرانی، وتەبێژی حکومەتی ئێران ئەمڕۆ لە کۆبوونەوەی دەستەی حکومەتدا بە فەرمی دیاری کردنی ئارەش لهۆنی وەک پارێزگاری سنە راگەیاند.

ئارەش لهۆنی تەمەن 49 ساڵ و لەدایکبووی شاری پاوەی پارێزگای کرماشانە، پێشتر نوێنەری شارەکانی پاوە و جوانڕۆ و روانسەر بووە لە پەرلەمانی ئێران.

پێدانی ئەم پۆستە لە چوارچێوەی بەڵێنەکانی مەسعود پزشکیان سەرۆکی ئێران دێت، کە لە بانگەشەی هەڵبژاردن بەڵێنی دابوو پۆست و بەرپرسیارێتی بە کوردی سوننەمەزهەب بدات.

ئەوەش دووەم كوردی سوننە مەزهەبە لە كابینەكەی مەسعود پزیشكیان پۆستی باڵا وەردەگرێت دوای عەبدولڕەحیم حسێن زادە جێگری سەرۆككۆمار بۆ كاروباری گەشەپێدانی گوند و ناوچە پەراوێزخراوەكان.