لیژنەی دارایی عێراق مەرجێکی نوێ لە بارەی جێبەجێکردنی یاسای خانەنشینی بۆ هەرێم دادەنێت

ناوەندی هەواڵ

لیژنەی دارایی ئەنجوومەنى نوێنەرانى عێراق داوا لە هەرێم دەکات ئەو پارانە بۆ عێراق بگەرێنێتەوە كە لەساڵانی خزمەتی خانەنیشینانی بڕیووە، بۆ ئەوەی خانەنیشینەكانی یاسای خانەنیشینی یەكگرتوو بیانگرێتەوە.

عەتوان عەتوانی، سەرۆكی لیژنەى دارایى لە ئەنجوومەنى نوێنەرانى عێراق لە میانى کۆبوونەوەیەکى لەگەڵ وەفدێكی پێشمەرگە دێرینەكانی پارێزگای سلێمانی رایگەیاندووە، پابەندكردنی حكومەتی هەرێم بە تەوتین كردنی مووچە لە بانكە حكومیەكان، ئامانجی زامنكردنی مافەكانی هاوڵاتییان و بەدیهێنانی دادپەروەریە، بڕیارەكە هیچ رەهەندێكی سیاسی نییە.

دەشڵێت، ئەندامی لیژنەكەیان كۆكن لەسەر پێویستی دورخستنەوەی دۆسیەی مووچە لە كێشمەكێشە سیاسیەكان، لەگەڵ جەختكردن بە پابەندبوونی تەواو بە دەستوری عێراق، بەجۆرێك دادپەروەری بۆ تەواوی هاووڵاتییان دەستەبەربكات.

لەبارەی دۆسیەی خانەنیشانی هەرێمی كوردستانیش، سەرۆكی لیژنەی دارایی پەرلەمانی عێراق ئاماژەی بەوەشکردووە، کە شمولكردنی خانەنیشانی هەرێم بە یاسای خانەنیشینی فیدراڵی پێویستی بەوەیە حكومەتی هەرێمی كوردستان ئەو پارانە رەوانەی وەزارەتی دارایی عێراق بكات، كە لە خانەنیشینانی بڕیوە لە ساڵانی خزمەتكردنیان، بۆ ئەوەی پرسەكەیان چارەسەربكرێت.

بڕیاربوو بۆ مووچەى مانگى حەوت مووچەى خانەنشینان هاوتاى عێراق بکرێت، بەڵام هاوتاکردنەکە تەنها بەشێکى خانەنشینانى گرتەوە و خانەنشینى پێشمەرگە لە بڕیارەکە بەدەرکراون و تا ئێستا کێشەکەیان بە چارەسەرنەکراوى ماوەتەوە و دیار نییە کەى مووچەکانیان هاوتا دجەکرێت.