پرسى خانەنشینى سەربازى لیژنەى دارایى عێراق دەهێنێتە هەرێم

ناوەندی هەواڵ

بڕیارە هەفتەى داهاتوو جارێکى دیکە لیژنەى دارایى ئەنجوومەنى نوێنەرانى عێراق سەردانى هەرێم بکەنەوە، بۆ تاوتوێکردنى چەند پرسێکى گرنگ و یەکێک لە پرسەکان تایبەتە بە خانەنشینانى سەربازى.

عەتوان عەتوانی، سەرۆکی لیژنەی دارایی پەرلەمانی عێراق رایگەیاند،هەفتەی داهاتوو وەک لیژنەی دارایی پەرلەمانی عێراق سەردانی هەولێر دەکەین و لەگەڵ وەزارەتی دارایی و ئابووریی هەرێمی کوردستان کۆدەبنەوە.

تەوەرى سەرەکى کۆبونەوەکەش تایبەتە بە پرسەکانی خاڵەسنورییەکان، خانەنشینی سەربازی، چاودێریی کۆمەڵایەتی و داهاتە نانەوتییەکان.

 دەشڵێت، سەردانەکە لەسەر خاڵە ناکۆکەکان دەوەستێت، هەروەها پشتیوانیکردنی لایەنە ئەرێنییەکان و چەسپاندنی ئەو رێککەوتنە و چارەسەرکردنی ناکۆکییەکان و داخستنی لاپەڕەی رابردوو دەبێت. ئەم ئیرادەیە هێزمان پێدەدات، لەسەر ئەوەی کۆتایی بە ناکۆکییەکان بێت.

بەهۆى دابەزینى نرخى نەوت مەترسى کورتهێنان لە ئارادایە، ئەوەش وایکردووە لیژنەى دارایى و ئابورى هەوڵەکانى بۆ چاودێری و کۆکردنەوەی داهاتە نانەوتییەکان چڕبکاتەوە.