ئەنجومەنی عەفرین و شەهبا: ئەو کەسانەی لەگوندەواری باکووری شاری حەلەب گیریان خواردووە ئەمڕۆ ڕزگاردەكرێن

ناوەندی هەواڵ

ئەنجومەنی"عەفرین و شەهبا" ڕاگەیەندراوێکی سەبارەت بە ئاوارەکانی ناوچەکانی ئەلشەهبای گوندەواری باکووری شاری حەلەب بڵاوکردەوە و ڕایانگەیاندووە، ئەوانەی لە ناوچەکە گیریان خواردووە ئەمڕۆ رزگاردەكرێن.

دوێنێ دووشەممە، ژەنەڕاڵ مەزڵوم عەبدی، فەرماندەی گشتی هێزەکانی سوریای دیموکرات ڕایگەیاند، هێزەکانیان سەرقاڵی کردنەوەی ڕێڕەوێکی سەلامەتن بۆ دوورخستنەوەی ئاوارەکانی عەفرین كە لە شارۆچکەی تەل رەفعەت و "شەهبان".

ئەمڕۆ سێشەممە، ئەنجومەنی "عەفرین و شەهبا" كە ئەنجومەنێکی خۆجێییە و سەر بە بەرێوبەرایەتی خۆسەری ڕۆژئاوای كوردستانە، لە ڕاگەیەندراوی ڕوونیکردووەتەوە، دەبێت ئاوارەکان پەیوەندی بە ئەنجومەنەکەوە بکەن بۆ ئەوەی بەسەلامەتی لەو شارۆچكانە ڕزگاریان بكەن، و ڕاشیگەیاند كە “ئەمڕۆ دوا ڕۆژە كە ڕێگە دەدرێت دەربچن".

پاسەکان بە گوندەکانی "خەت ئەحداس، کەمپی سەردەم، تەل قەراح، ئەحرەس، كەفەر ناسح، کفر نایە، رێگای حەلەب و عەفرین، نەبل، زوق كەبیر، باشمەڕە، كالۆتە، بورج قاس، و پاشان بگەڕێنەوە بۆ نەبل و ڕێگای زیارە و ئەقیبە و ئەبیین و پاشان بۆ دێر جەمال و تەل رەفعەت و فافێن و گوندەکانی دەوروبەری و ئەحداس و كەمپی بەرخودان تێدەپەڕن.
ئاماژەی بەوەشکراوە، ئەو پاسانەی لە شارۆچكەی تەبقەەوە دێن، بەناو گوندەكانی ناوچەی شەهبا و شێراوادا دەرۆن بۆ ڕزگاركردنی ئاوەرە كوردەكان.