شێخ جەعفەر ڕەخنە لە مانگرتنی مامۆستایان دەگرێت

ناوەندی هەواڵ

جێگری سەرۆکی هەرێمی کوردستان ڕەخنە لە مانگرتنی مامۆستایان و فەرمانبەران دەگرێت و دەڵێت "دەیانتوانی بە ئسلوبێکی دیکە داوای مافی خۆیان بکەن و منداڵەکان بەرەڵا نەکەن".

جەعفەر شێخ مستەفا، جێگری سەرۆکی هەرێمی کوردستان ڕایگەیاند:"مامۆستایان دەیانتوانی بە ئسلوبێکی دیکە داوای مافی خۆیان بکەن و مانیش بگرن، بەڵام منداڵەکان بەرەڵا نەکەن و دەرگای قوتابخانەکان دانەخەن".

وتەکانی جێگری سەرۆکی هەرێم لەکاتێکدایە ژمارەیەک لە مامۆستایان و فەرمانبەران پێنج ڕۆژە لە سلێمانی لە نزیک بارەگای نەتەوەیەکگرتووەکان مانیان لە خواردن و خواردنەوە گرتووە، هۆکارەکەش ئەوەیە کە حکومەتی هەرێمی کوردستان مووچەی مانگی ١٢ی فەرمانبەرانی هەرێمی کوردستانی نەداوە و دیاریش نییە ئەو مووچەیە دەدات یاخودنا، لەکاتێکدا ئێستا کاتی دابەشکردنی مووچەی مانگی یەکیش تێپەڕیوە.