وادەی کۆنفرانسی یەکڕیزی هەڵوێستی کورد لە رۆژئاوا دیاریکرا

فەرماندەی گشتیی هێزەکانی سووریای دیموکرات (هەسەدە) رایگەیاندن هەفتەى داهاتوو کۆنفرانسی یەکڕیزی هەڵوێستی کوردی لە ڕۆژئاوای کوردستان  بەڕیوەدەچێت.

مەزڵووم عەبدی، فەرماندەی گشتیی هێزەکانی سووریای دیموکرات (هەسەدە)، لە لاپەڕەی تایبەتی خۆی لە تۆڕی کۆمەڵایەتی ئێکس، نوسیویەتى،  "ڕۆژی 26ی ئەم مانگە لەڕۆژئاوای کوردستان کۆنفرانسی یەکڕیزیی هەڵوێستی کورد بەڕێوەدەبرێت، بەخۆشحاڵییەوە بەگەلەکەمان ڕادەگەیه‌نین کۆنفرانسه‌كه‌ پێویستییەکی نەتەوەییە بۆ چارەسەرکردنی کێشەکانی گەلی کورد لەسوریا".

عه‌بدى داوا لەهەمولایەنە کوردستانییەکانی سوریا دەکات بەرپرسیارێتیی نەتەوەیی خۆیان جێبەجێبکەن.

دوای ڕووخانی ڕژێمی بەعسی سووریا لە 8ی کانوونی یەکەمی 2024، گەلی کورد بۆ بەشدارییکردن لە حکومەتی نوێی سووریا پێویستی بە یەکڕیزی ناوخۆیی هەبوو، دوای هەوڵە بەردەوامەکان و ئەنجامدانی چەندین کۆبوونەوە لە نێوان لایەنە سیاسییەکانی ڕۆژئاوای کوردستان، بەپێویست بینرا کە گەلی کورد بە یەکڕیزیی بەشداری لە پێکهێنانی حکومەتی نوێی سووریا بکات.