ئیسرائیل به‌ 60 هه‌زار سه‌ربازه‌وه‌ ڕوو له‌غه‌ززه‌ ده‌كات

ناوەندی هەواڵ

ئیسرائیل کاتز وەزیری بەرگریی ئیسرائیل، پلانی داگیرکردنی شاری غەززەی پەسەندکرد کە ئەیال زەمیر سەرۆک ئەرکانی سوپا پێشکەشیکردبوو، وەزارەتەکەش فەرمانی بانگهێشتکردنی بۆ نزیکەی 60 هەزار سەربازی یەدەگ دەرکردوه‌ کە دەبێت بەشداریی لەو ئۆپەراسیۆنەدا بکەن.

شەڕی نێوان حەماس‌و ئیسرائیل نزیکدەبێتەوە لەسێ ساڵ‌و بەهۆیەوە هەزاران کەس کوژراون‌و نزیکەی دوو ملیۆنی دیکەش ئاوارەبون.

له‌ئێستاشدا ئیسرائیل ئامادەکاریی دەکات بۆ داگیرکردنی تەواوەتی غەززەو گواستنەوەی دانیشتوانه‌كه‌ى بەرەو باشورى شاره‌كه‌.

ڕۆژنامەی زە تایمز ئۆفی ئیسرائیل بڵاویكرده‌وه‌، کاتز دوای ئەوەی شەوی ڕابردوو لەگەڵ سەرۆک ئەرکانی سوپاو فەرماندەکانی سوپادا سەبارەت بەداگیرکردنی شاری غەززە کۆبوەتەوە، بەیانیی ئه‌مڕۆ پلانی سوپای بۆ داگیرکردنی شاری غەززە پەسەندکردوە.

وەک ئه‌وه‌ى ڕۆژنامه‌ ئیسرائیلیه‌كه‌ نوسیویه‌تى، "دواى چونه‌ ناوه‌وه‌ى ته‌واوه‌تى سه‌ربازانى ئیسرائیل، نزیکەی یەک ملیۆن هاوڵاتی فەڵەستینی بۆ باشوری ناوچەکە ده‌گوازرێنه‌وه‌، ئۆپه‌راسیۆنه‌كه‌ش ناونراوه‌، (گالیسکەکانی شەڕی گیدئۆن)''.

هه‌ر له‌وباره‌یه‌وه‌ وەزارەتى به‌رگریى ئیسرائیل، فەرمانێكى به‌په‌له‌ى ئاراسته‌ى سه‌ربازه‌كانى كردوه‌و بانگهێشتنامه‌ى بۆ نزیکەی 60 هەزار سەربازی یەدەگ ناردوه‌ کە دەبێت بەشداریی لەو ئۆپەراسیۆنەدا بکەن.