لە هەڵەبجە ماتەمینی گشتی ڕاگەیەنرا

ناوەندی هەواڵ

پارێزگاری هەڵەبجە بەهۆی سووتان و گیان لەدەستدانی دوو كەس بەهۆی هەوڵدانیان بۆ كوژاندنەوەی ئاگرەكەی سنووری ئەو پارێزگایە بڕیاریدا دوو ڕۆژ ماتەمینی گشتی ڕابگەیەنرێت.

هاووڵاتیانی خۆشەویست و دامودەزگاکانی پارێزگای هەڵەبجە:

بە دڵێکی پڕ لە خەم و پەژارەیەكی زۆرەوە، پارێزگاکەمان ڕووبەڕووی کارەساتێکی دڵتەزێنی ئاگرکەوتنەوە بوویەوە لە ناوچەکانی چنار و مۆردین و نەیجەڵە، کە بەداخەوە بووە هۆی شەهیدبوونی دوو ڕۆڵەی دڵسۆزی پارێزگاکەمان. ئەم دوو هاووڵاتییە خۆشەویستە، کە لەپێناو پاراستنی ژینگە و خاکدا گیانیان بەخشی، ئێمە وەک “شەهیدی ژینگەی هەڵەبجە و کوردستان” ناویان دەبەین.

بۆ ڕێزگرتن لە گیانی پاکیان و هاوبەشیکردنی خەمی بنەماڵە بەڕێزەکانیان، پارێزگای هەڵەبجە بڕیاریدا بە ڕاگەیاندنی ماتەمینی گشتی بۆ ماوەی دوو ڕۆژ.

بۆ ئەو مەبەستەش، ئاڵای پیرۆزی کوردستان لەسەر سەرجەم دامودەزگا فەرمییەکانی سنووری پارێزگای هەڵەبجە بۆ نیوە دادەگیرێت.

سەرجەم ئاهەنگ و بۆنە و چالاکییەکی شادی ئامێز ڕادەگیرێت وەک ڕێزێک بۆ ڕۆحی پاکی شەهیدەكانمان.

هاوکات، داوا لە هاووڵاتیانی خۆشەویست دەکەین کە لەم وەرزە گەرمەدا تا ئەوپەڕی ئاگاداری ڕێنماییەکانی خۆپارێزی بن لە مەترسییەکانی ئاگرکەوتنەوە، بۆ ئەوەی گیان و سامانی گشتی و تایبەت پارێزراو بن.

دووبارە پرسە و سەرەخۆشیی قووڵی خۆمان ئاراستەی بنەماڵە و کەسوکاری هەردوو شەهیدەکە دەکەین. ڕۆحیان شاد و یادیان هەمیشە بەخێر.