شەڕەکەی لالەزار دەستەی مافی مرۆڤى كرد بە دو بەشەوە

بەشێک لە ئەندامانی دەستەی سەربەخۆی مافی مرۆڤ سەبارەت بە بەیاننامەكەى دوێنێ شەوى دەستەكە، دەڵێن: کۆمەڵێک کەس لە شەڕەکەدا کوژراوە و دەزگا ئەمنییەکانی سلێمانی زانیاری نادەن، بەشێکیشیان دەڵێن؛ نەخێر دەزگا ئەمنییەکانی سلێمانی لە یەکەم ڕۆژەوە هاوکاربون.

ئەو بەشەى ئەندامانى دەستەكە لە راگەیاندراوێك دا ئەوەیان خستۆتەڕو كە لە نوسینى بەیاننامەكەدا پرس بەوان نەکراوە و بە هەڵوێستێکی سیاسی دیزاینکراوی دەزانن، هاوكات چاودێرانى سیاسیش پێیانوایە، کێشەکانی یەکێتی و پارتی دەستەی سەربەخۆیی مافی مرۆڤیشی گرتەوە.

هەر لەو راگەیاندراوەى بەشێک لە ئەندامانی ئەنجومەنی کارگێڕيی دەستەی سەربەخۆیی مافی مرۆڤ دا هاتوە،  دژی بەیاننامەکەی دوێنی شەوی دەستەکەین كه بەناوی دەستەی سەربەخۆی مافی مرۆڤەوە بڵاوکراوەتەوە، ئێمە  نە ئاگامان لێی بوە، نە پرسمان پێکراوە.

 هاوكات ئەو بەشەى ترى دەستەكە ئاماژەیان بەوەداوە، كە دەزگا ئەمنییەکانی سلێمانی  لەرۆژی یەکەمی روداوەکەی لالەزار و بابەتەکانی تریش هاوکاربون هەر لەڕێگەی ئێمەشەوە، ئاسایشی گشتی سلێمانی ئاسانکاریی کرد بۆ سەردانی کردنی کەسوکاری دەستگیرکراوەکان و هیچ ڕێگرییەک نەبوە بۆ کارەکانمان.

ئەو ئەندامانەی دەستەی مافی مرۆڤ کە ناڕازین؛ سەرسوڕمانی خۆیان لە ڕاگەیاندراوی دوێنی شەوی دەستەکە ڕاگەیاند و دەڵین پرسیاری جیددی ئەوەیە: ئەی ئەو بەشەی ئەنجومەنی کارگێری دەستە لەکوێ بون کاتێک لە شەرەکەی خورشید هەرکی و هێزە ئەمنییەکان، دو کەس لە هێزەکان شەهیدکران و کەسی داواکراویش لەمیوانخانە دانرابو، بەڵام ئەو تیمەی ناو دەستەكە شتێکیان نەوت؟.

هاوكات لە بەشێکی دیکەی ڕاگەیاندراوەکەدا هاتوە، ئەی کە چەند ڕۆژێک بەر لە ئێستا چەند کەسێک هەوڵی تیرۆرکردنی ڕۆژنامەنوس هێمن مامەندیان داو دواتر هەڵهاتن بۆ شاری هەولێر و ئاسایشی گشتی سلێمانی پەیامی بڵاوکردەوە، بۆچی ئەرک پێ سپێردراوانی ئەو لایەنە سیاسییەی ناو دەستەكە داوایان لەدەزگا ئەمنییەکانی هەولێر نەکرد ئەو کەسانە دەستگیر بکەن و بیدەنە دادگا؟.