لیستى موچه‌ى مانگى 7 واژۆكراو كار له‌سه‌ر مانگى 8و9 به‌رده‌وامه‌

ئامادەکردنی لیستی موچەی مانگی هەشت لەقۆناغی کۆتاییدایە، وەزارەتی دارایی‌و ئابوریی هەرێم کار لەسەر ئەوەدەکات، بەمنزیکانە ڕەوانەی بەغدای بکات.

گفتوگۆی نێوان هەولێرو بەغدا لەسەر پرسی موچەو ڕادەستکردنی داهاتی نانەوتی بەردەوامە، لیستی موچەی مانگی حەوت لەبەغدا وردبینی کراوە، ماوەتەوە سەر ئەوەی بڕیاری خەرجکردنی پارەکەی بدرێت؛ ئێستا وەزارەتی دارایی کار لەسەر ئامادەکردنی لیستی موچەی مانگەکانی 8و 9 دەکات.

یادگار جەبار سەرپەرشتیاری بایۆمەتری لەگەنجینەی سلێمانی ڕایگه‌یاند، "هەر پارێزگایەو بەجیا لیستی موچەی مانگانەی ئامادە دەکات‌و ڕەوانەی وەزارەتی دارایی دەکات، لەگەنجینەی سلێمانی لیستی موچەی مانگی هەشتمان تەواوکردوەو ڕەوانەی وەزارەت کراوە".

سەرچاوەیەکیش لەوەزارەتی دارایی هەرێم ئاشكرایكرد، "لەوەزارەت کارکردن لەلیستی موچەی مانگی هەشت بەردەوامە، دوای ئەوەی تەواومان کرد بۆ بەغدای دەنێرین".

لەڕۆژی 3ى 8ى 2025وه‌ لیستی موچەی مانگی حەوت ڕادەستی فەرمانگەی ژمێریاریی وەزارەتی دارایی فیدراڵی کراوە، بەڵام تائێستا پارەکەی خەرجنەکراوە.